Ni irushanwa ryo kwibohora Liberation cup riri gukinwa ku nshuro yaryo yambere hano mu Rwanda mu mukino wa volleyball. Mu bagabo no mu bari n’abategarugori ku munsi w’ejo wo kuwa 6 nibwo hakinwaga imikino yo mu matsinda ndetse haraye hamenyekanye amakipe ageze muri 1/2 k’irangiza. Imikino yagombaga gukomeza uyu munsi yose ikabera muri BK Arena ndetse hakaba n’imikino yanyuma.
Imikino yatangiye saa 09:00 za mu gitondo hakinwa imikino ya 1/2. Mu bari n’abategarugori, muri Ecole des Anges Remera ikipe ya Police WVC yageze ku mukino wanyuma itsinze Ruhango amaseti 3-1, ni nako muri BK Arena rwari rwambikanye hagati ya RRA WVC na APR WVC ni umukino wasabye iseti ya kamarampaka kugira ngo bakiranuke maze APR WVC ibyitwaramo neza igera ku mukino wanyuma itsinze amaseti 3-2. Mu bagabo nabo byari ikotaniro, habanjemo Gisagara VC n’ikipe ya REG VC, ntamananiza Gisagara VC igera ku mukino wanyuma itsinze amaseti 3-1, hanyuma hakurikiyeho umukino wa Police VC na APR VC umukino benshi bakunze kwita uw’umutekano, aha naho Police ntiyagoranye kuko bayitsinze amaseti 3-1 maze APR VC igera ku mukino wanyuma ityo.
Umukino wanyuma mu byiciro byombi niwo warukurikiyeho, abitabireye iyi mikino bafite akamwenyu ku maso kuko bari bategereje ibiro bidasanzwe benshi basigaye bita amatoni cyangwa amashoti ndetse n’ihangana ridasanzwe mu mukino wanyuma.
Habanjemo abari n’abategarugori, umukino w’umutekano (derby y’umutekano), Police WVC na APR WVC, ni umukino benshi bari bategereje ndetse waje kurangira Police WVC iherutse gutwara irushanwa ryo kwibuka jenoside yakorewe Abatutsi yo mu 1994 rizwi nka GMT (Genocide Memorial Tournement) yongera gutwara ikindi gikombe itsinze amaseti 3-1 (25-14, 25-18, 20-25, 25-14). Ikipe ya APR WVC yabashije gukuramo iseti 1 gusa ntacyo yayimariye.
Nyuma y’abari n’abategarugori hakurikiyeho umukino wanyuma wa basaza babo, ni umukino karundura hagati ya Gisagara VC iherutse kwegukana GMT na APR VC itaherukaga ku mukino wanyuma uwo ariwo wose mu mwaka ushize w’imikino. APR yinjiye mu mukino neza, ibanza amaseti 2-0 (25-21, 25-22), mu iseti ya gatatu Gisagara yinyara mu isunzu irayitwara ku manota 25-23, iseti ya kane yo yabaye akamaramaza, Gisagara yasabwaga kuyitsinda ngo bage mu iseti ya kamarampaka (seul) naho APR isabwa kuyitsinda ngo irangize umukino. Iyi seti ya kane yariryoheye ijisho yarangiye APR iyitwaye ku manota 27-25 itwara igikombe ityo ku nsinzi y’amaseti 3-1.
Abafana ba Gisagara VC ntibanyuzwe n’uyu mukino kuko batsinzwe ariko bakavuga ko babuze inkingi zabo za mwamba harimo Samuel uzwi nka Tayson na passeur NDAYISABA Sylvestre wabanje kugira ikibazo k’imvune. Ni mu gihe ikipe ya APR VC yo mu ntwaro isanganywe nka Merci, Gatsinzi, Vincent na Prince yari yongeyemo umwataka ukomoka muri Kenya Denis na passeur Brian nawe ukomoka muri Kenya.
