APR VC yatsinze Police VC amaseti 3-1 mu mukino wabimburiye indi y’umunsi wa 9 wa shampiyona ya volleyball y’u Rwanda mu bagabo.
Kuri uyu wa gatanu tariki 24 Mutarama 2025 nibwo APR VC yakinaga na Police VC muri Petit Stade i Remera, APR VC yakinaga umukino wayo wa 8 wa shampiyona naho Police VC yakinaga umukino wayo wa 9 wa shampiyona.
APR VC yagiye gukina uyu mukino idafite babiri mu bakinnyi bayo b’inkingi za mwamba barimo Gatsinzi Venuste (Right hitter) na Masabo Bertin (Libero) bombi bafite ibibazo by’imvune.
Police VC yatangiye neza itwara iseti ya mbere ku manota 25-18, abari bakurikiye uyu mukino baketse ko ushobora kuba ugiye korohera Police VC nyamara siko byaje kuyigendekera.
APR VC yavuye inyuma itwara iseti ya kabiri ku manota 25-23, yongera kwisubiza iseti ya gatatu ku manota 25-21 ubundi itwara iseti y’insinzi ku manota 25-23.
Uyu wabaye umukino wa mbere Police VC itsinzwe muri shampiyona y’uyu mwaka mu gihe yari intsinzi ya 6 kuri APR VC mu mikino 8 imaze gukina muri shampiyona y’uyu mwaka.
Police VC yakomeje kuyobora urutonde rw’agateganyo rwa shampiyona n’amanota 24, naho APR VC ifite igikombe giheruka cya Shampiyona yashimangiye umwanya wa kabiri n’amanota 18 aho ikurikirwa na Kepler VC ifite amanota 15.
