Hagiye kwiyambazwa umukino wa gatatu ngo hamenyekane ikipe itwara igikombe cya Shampiyona ya volleyball mu bagabo no mu bari n’abategarugori.
Ibi bije nyuma y’aho mu bagabo ikipe ya APR VC itsinze Kepler VC mu mukino wa kabiri wa nyuma wa kamarampaka (Playoffs 2024) kuri uyu wa gatandatu tariki 25 Gicurasi 2024 muri Ecole Notre Dame des Anges i Remera.
Kepler VC niyo yatangiye neza ku wa gatanu itsinda APR VC amaseti 3-1 (25-14, 25-18, 19-25, 25-18).
Kepler VC n’ubundi yatangiye neza umukino wa kabiri ndetse itwara iseti ya mbere ku manota 25-23.
APR VC yanze kuba insina ngufi nayo itwara iseti ya kabiri y’umukino ikaba iya mbere kuri yo ku manota 25-21.
Kepler VC ifite amashagaga cyane ko iyi ari inshuro yayo ya mbere ikina iyi mikino, yongeye gutwara iseti ya kabiri ku manota 25-20.
APR VC yakunze kurangwa no kudacika intege, yavuye inyuma maze itwara iseti ya kabiri nayo ku manota 25-20 nibwo hahise hiyambazwa iseti ya gatanu (iseti ya kamarampaka) izwi nka seoul.
APR VC yaje kuyegukana ku manota 15-12 bituma amakipe yombi anganya umukino 1-1 bivuze ko kuri iki cyumweru harakinwa umukino wa gatatu ngo hamenyekane ikipe itwara igikombe cya Shampiyona ya volleyball mu bagabo 2023-24.
Mu bari n’abategarugori nabo ni uko byagenze kuko ku munsi wo ku wa gatanu muri Ecole Notre Dame des Anges, Police WVC yari yihanangirije APR WVC mu mukino wa mbere wa final ya playoffs iyitsinda amaseti 3-0 (25-12, 25-17, 25-22).
Kuri uyu wa gatandatu, APR WVC bigoranye cyane kuko byasabye iseti ya kamarampaka (seoul) yatsinze umukino ku maseti 3-2 (25-21, 11-25, 25-21, 15-25, 15-9).
Amakipe yombi yahise anganya umukino 1-1 bivuze ko kuri iki cyumweru hariyambazwa umukino wa gatatu ngo hamenyekane ikipe itwara igikombe cya Shampiyona ya volleyball mu bari n’abategarugori 2023-24.
Uretse imikino ya nyuma ya Playoffs, hari no gukinwa imikino yo guhatanira umwanya wa gatatu.
Mu bari n’abategarugori ikipe ya RRA WVC ifite igikombe giheruka cya Shampiyona yamaze kwegukana umwanya wa gatatu nyuma yo gutsinda Ruhango WVC imikino 2-0, imikino yombi yarangiye ari amaseti 3-1.
Mu guhatanira umwanya wa gatatu mu bagabo naho hariyambazwa umukino wa gatatu ngo hamenyekane ikipe yegukana uyu mwanya.
Umukino wa mbere wabaye ku wa gatanu warangiye REG VC itsinze Police VC amaseti 3-1 (27-29, 25-17, 25-19, 25-23).
Kuri uyu wa gatandatu, Police VC nayo yavuye inyuma maze itsinda umukino wayo wa mbere ku maseti 3-2 (25-23, 20-25, 25-21, 18-25, 15-8).
Ibi byatumye amakipe yombi kuri iki cyumweru agomba gukina umukino wa gatatu kugira ngo hamenyekane ikipe yegukana umwanya wa gatatu.
Imikino iratangira saa 13:00 muri Ecole Notre Dame des Anges hakinwa umwanya wa gatatu mu bagabo.
Madamu Misitiri wa Siporo MUNYANGAJU Aurore Mimosa (wambaye ishati y’umweru) yari mu bitabiriye imikino ya Playoffs kuri uyu wa gatandatu muri Ecole Notre Dame des Anges
