REG VC na EAUR VC zabonye intsinzi ku munsi wa kabiri wa shampiyona y’u Rwanda ya volleyball mu bagabo zitsinze RP Ngoma College na RP College na Gisagara VC.
Kuri uyu wa gatandatu tariki 26 Ukwakira 2024 muri Petit Stade i Remera habereye imikino ibiri y’umunsi wa kabiri wa shampiyona ya volleyball m0u bagabo.
Umukino wa mbere wahuje REG VC na RP Ngoma College watangiye saa kumi n’imwe zirenzeho iminota 35.
Uyu mukino warangiye REG VC itsinze RP Ngoma amaseti 3-1 (25-13, 23-25, 25-16, 25-15).
Nyuma y’uyu mukino hakurikiyeho umukino wahuje EAUR VC na Gisagara VC.
Umukino watangiye abantu benshi baha amahirwe Gisagara VC yo gutsinda gusa ibitekerezo byatangiye kuba byinshi mu mitwe y’abarebye uyu mukino nyuma y’iseti ya mbere.
EAUR VC yatangiye yataka imipira ikomeye y’abarimo Iga Mohamed wakinaga inyuma (Right attacker) na Nshuti Jean Paul wakinaga imbere (Left attacker) nyuma y’imipira myiza bahabwaga na Kayiranga Evrard, ibi byayihesheje gutwara iseti ya mbere itsinze amanota 26-24.
Mu iseti ya kabiri y’umukino nayo harimo guhangana gukomeye ku mpande zombi kwanatumye amakipe yombi anganya amanota 24-24 bituma hiyambazwa amanota y’inyongera aho ikipe ishyizemo ikinyuranyo cy’amanota abiri ariyo yegukana iseti.
Iyi seti ya kabiri yaje kurangira Gisagara VC iyegukanye itsinze amanota 27-25.
EAUR VC y’umutoza Dusabimana Vincent uzwi nka Gasongo ntiyigeze icika intege ahubwo yafatiranye amakosa menshi ya Gisagara VC yarimo kwica resebusiyo (Receptions) no kutarenza serivise itwara iseti ya gatatu itsinze amanota 25-22.
Iseti ya kane yari iya nyuma kuri Gisagara VC yo gupfa no gukira, yasabwaga kuyitwara kugira ngo hiyambazwe iseti ya kamarampaka gusa ntibyigeze biyikundira.
Iseti ya kane nayo yarangiye EAUR VC iyegukanye itsinze Gisagara VC amanota 25-23, umukino wahise urangira EAUR VC itsinze Gisagara VC amaseti 3-1.
Uyu ni umukino wa kabiri EAUR VC yaritsinze muri shampiyona nyuma y’uwo yatsinze RP Ngoma College amaseti 3-1 ku munsi wa mbere wa shampiyona.
Shampiyona irakomeza kuri iki cyumweru tariki 27 Ukwakira 2024 hakinwa umukino umwe uzahuza Kepler VC na KVC muri Petit Stade saa kumi z’umugoroba.