Police VC yatsinze APR VC amaseti 3-0 mu mukino wabimburiye indi y’umunsi wa kabiri wa shampiyona y’u Rwanda ya volleyball mu bagabo.
Kuri uyu wa gatanu tariki 25 Ukwakira 2024 nibwo muri Petit Stade hakomezaga shampiyona ya volleyball hakinwa umunsi wa kabiri.
APR VC na Police VC nizo zabimburiye indi mikino ya shampiyona, wari umukino wa kabiri kuri Police VC muri shampiyona, ukaba uwa mbere kuri APR VC.
Umukino waruteganyijwe gutangira saa moya z’ijoro gusa watangiye utinzeho isaha imwe n’iminota kuko muri Petit Stade habanjemo umukino wahuje APR WVC na Police WVC ugatinda.
Iseti ya mbere y’umukino yatangiye APR VC na APR VC zigendana runono gusa Police VC iza gufatira ku makosa menshi ya APR VC arimo kwica resebusiyo (receptions) itwara iseti itsinze amanota 25-22.
Uwahumbije amaso gato mu iseti ya kabiri yayabumbuye yarangiye kuko yihuse cyane, Police VC nayo yayitwaye itsinze APR VC amanota 25-17.
APR VC y’umutoza Sammy Mulinge yagiye mu iseti ya gatatu igerageza guhatana ngo irebe ko yaguma mu mukino gusa ntibyayihiriye na mba.
Iyi seti nayo yarangiye Police VC iyegukanye itsinze APR VC amanota 25-22, umukino muri rusange warangiye Police VC itsinze APR VC amaseti 3-0 iba intsinzi ya kabiri ya Police VC muri shampiyona.
Shampiyona irakomeza kuri uyu wa gatandatu EAUR ikina na Gisagara VC naho RP Ngoma ikina na REG VC.