Umunyabigwi w’umunya-Kenya Henry Rono waciye uduhigo 4 mu gusiganwa ku maguru yitabye Imana nyuma y’iminsi 3 yizihije isabukuru y’amavuko y’imyaka 72.
Mu buzima bwa Rono nk’umukinnyi usiganwa ku maguru umwaka w’1978 niwo wamubereye mwiza ndetse awucamo uduhigo mu gihe kitarenze amezi 3.
Mu 1978, Rono yatwaye irushanwa ryo gusiganwa ku maguru muri metero 5,000 no muri metero 3,000 zibamo inzitane (Steeplechase) mu mikino ya Common Wealth yabereye muri Edmonton muri Canada, yatwaye kandi umudari wa zahabu mu gusiganwa mu nzitane muri metero 3,000 no muri metero 10,000 mu mikino nyafurika yabereye Algiers muri Algeria.
Mu gihe k’iminsi 81 gusa, Rono yaciye uduhigo 4 mu gusiganwa ku maguru two kwiruka igihe gito muri metero 10,000 aho yazirutse iminota 27 n’amasegonda 5 n’amatsiyerisi 5.
Rono yirutse metero 5,000 mu minota 13 n’amasegonda 8 n’amatsiyerisi 4, yirutse kandi metero 3,000 akoresheje iminota 8 n’amasegonda 5 n’amatsiyerisi 4.
Yongeye guca agahigo kandi yari yaraciye mu kwiruka metero 3,000 mu gihe gito aho noneho yakoresheje iminota 7 n’amasegonda 32 n’itsiyerisi rimwe.
Rono akaba yitabye Imana kuri uyu wa kane aguye mu bitaro byo mu murwa mukuru wa Kenya Nairobi aho yaramaze iminsi 10 avurirwa.
Urupfu rwa Henry Rono ruje nyuma y’urupfu rwa Kelvin Kiptum nawe wasiganwaga ku maguru uherutse kwitaba Imana ubwo yakoraga impanuka ari mu myitozo n’umutoza we Gervais Hakizimana.
