Mu ijoro ryo kuri uyu wa mbere nibwo habaga umukino ukomeye muri shampiyona yo mu Bwongereza y’abatarengeje imyaka 21 warangiye Manchester United ibifashijwemo n’umukinnyi w’imyaka 37 itsinze Manchester City ibitego 2-1.
Nyuma y’uyu mukino, inkuru yabaye Tom Huddlestone w’imyaka 37 hibazwa uko yakinnye mu mukino w’abatarengeje imyaka 21 y’amavuko.
Igitangaje, Huddlestone yakinnye umukino we wa mbere nk’umukinnyi wabigize umwuga muri 2003, mu bandi bakinnyi bari mu kibuga uretse umuzamu wa Manchester City Dermot William Mee wavutse muri 2002 ntawundi mukinnyi wari mu kibuga wari bwakavuke icyo gihe.
Ubundi Tom Huddlestone yahawe akazi ko gutoza akaba n’umukinnyi wa Manchester United y’abatarengeje imyaka 21 muri Kanama 2022 asimbuye Paul McShane kuri uwo mwanya.
Amategeko ya shampiyona y’abatarengeje imyaka 21 mu Bwongereza avuga ko ikipe ishobora gukoresha umuzamu urengeje iyi myaka ndetse n’abandi bakinnyi 5 batari umuzamu barengeje iyi myaka. Iri tegeko niryo rivugira Tom Huddlestone maze akemererwa gukina mu batarengeje imyaka 21 nyamara ayirenzaho imyaka 16.
Tom Huddlestone ni umwongereza ukina mu kibuga hagati yugarira, yatangiriye gukina nk’uwabigize umwuga mu ikipe ya Derby County, nyuma yaje kwerekeza muri Tottenham Hotspur muri 2005 maze ihita imutiza muri Wolverhampton Wanderers.
Muri 2013, Huddlestone yerekeje muri Hull City kugeza 2017 ubwo yasubiraga muri Derby County yakiniye kugeza muri 2020. Yaje gusubira muri Hull City ubundi aza muri Manchester United muri 2022 nk’umukinnyi akaba n’umutoza w’abatarengeje imyaka 21 y’amavuko.
