Abakunzi ba Arsenal(England) , Chelsea(England) , FC Barcelona(Spain) , AS Monaco(France) na Como(Italy) bose bahuriye ku kumenya no kuryoherwa n’ubuhanga bw’umukinnyi wo mu kibuga hagati ukomoka muri Espagne Francesc Fàbregas Soler wamenyekanye nka Cesc Fabregas. Uyu akaba yamaze gusezera ku mupira w’amaguru nk’uwabigize umwuga.
Cesc Fabregas yavutse tariki 4 Gicurasi 1987 avukira mu gihugu cya Espagne mu ntara ya Catalonia. Yatangiriye gukina umupira w’amaguru mu ikipe y’abato ya FC Barcelona izwi nka La Masia maze ku myaka 16 y’amavuko aza kwerekeza mu ikipe ya Arsenal mu gihugu cy’Ubwongereza ni muri 2003. Fabregas yakiniye ikipe ya Arsenal kugeza muri 2011 aho yayikiniye imikino 303 atsinda ibitego 57, atanga imipira ivamo ibitego 95.
Muri 2011 yaje gusubira mu rugo muri Espagne mu ikipe ya FC Barcelona aho yayikiniye kugeza muri 2014, mu mikino 151 yakiniye FC Barcelona yayitsindiye ibitego 42, atanga imipira ivamo ibitego 50; yavuye mu ikipe ya FC Barcelona asubira mu gihugu cy’Ubwongereza mu ikipe ya Chelsea aho yakinnye kugeza muri 2019.
Fabregas mu ikipe ya Chelsea yahakinnye imikino 198 atsinda ibitego 28 atanga imipira ivamo ibitego 38, nyuma yerekeje mu Bufaransa mu ikipe ya AS Monaco aho yayikiniye kugeza 2022 maze yerekeza mu Butaliyani mu ikipe ya Como ikina mu kiciro cya kabiri ari naho yarangirije gukina umupira w’amaguru nk’uwabigize umwuga.
Kuri uyu wa gatandatu tariki ya 1 Nyakanga 2023 nibwo Cesc Fabregas abinyujije ku mbugankoranyambaga ze yatangaje ko arekeye gukina umupira w’amaguru nk’uwabigize umwuga ndetse avuga ko atangiye urugendo rwe nk’umutoza aho agiye kuba umutoza w’ikipe y’abato ya Como.
Cesc Fabregas mu mikino yose yakiniye ikipe za clubs n’ikipe y’igihugu ya Espagne yatwaye igikombe cy’isi k’ibihugu kimwe, Igikombe k’i Burayi (Euro) inshuro 2, igikombe cya Shampiyona y’Ubwongereza(Premier League) inshuro 2, UEFA Super Cup imwe, igikombe k’isi cy’ama clubs kimwe, igikombe cya Shampiyona y’igihugu ya Espagne (La Liga) kimwe, Community Shield imwe, FA Cup imwe, English League cup imwe, igikombe cy’umwami (Copa del Rey) kimwe n’igikombe cya Supa copa d’Espagna ubugira kabiri.
Ku myaka 36 Cesc Fabregas akaba yasezeye ku mupira w’amaguru nk’uwabigize umwuga ndetse bimwe mu byo azibukirwaho ni ubuhanga bwe mu gutanga imipira ivamo ibitego aho bamwe batanatinya kumugereranya n’abandi bakinnyi bakomeye bo mu kibuga hagati kuko mu mikino 849 yakinnye muri rusange yatsinze ibitego 148, atanga imipira ivamo ibitego 253.
