Nyuma ya Bayern Munich na PSG, ikipe ya Real Madrid na Manchester City zabashije gukatisha itike ya 1/4 k’irangiza cya UEFA Champions League.
Real Madrid yo muri Espagne yari yakiriye RB Leipzig yo mu Budage kuri Santiago Bernabeu. Umukino ubanza wari warangiye Real Madrid itsinze igitego 1-0.
N’ubwo Leipzig yasabwaga gutsinda ngo ibashe gukomeza, ntibyigeze biyihira. Igice cya mbere cyarangiye amakipe yombi anganyije 0-0.
Mu gice cya kabiri ku munota wa 65 nibwo Vinicius Junior yatsindiye igitego Real Madrid ariko kapiteni wa Leipzig Willi Orbán aza kucyishyura ku munota wa 68.
Leipzig yakomeje gushaka igitego cya kabiri ariko myugariro Antonio Rudiger akomeza kuyibera ibamba.
Umukino warangiye amakipe yombi anganyije 1-1 bituma Real Madrid ikomeza n’igiteranyo k’ibitego 2-1.
Manchester City yo mu Bwongereza yari yakiriye FC Copenhagen yo muri Denmark kuri Etihad Stadium. Umukino ubanza wari warangiye Manchester City itsinze ibitego 3-1.
Umukino wo kwishyura nawo ntiwagoye Manchester City kuko yatsinze ibitego 3-1 n’ubundi.
Manuel Akanji ku munota wa 5, Julian Alvarez ku munota wa 9 na Erling Haaland ku munota wa 3 w’inyongera w’igice cya mbere nibo batsindiye Manchester City naho Copenhagen yatsindiwe na Mohamed Elyounoussi ku munota wa 29.
Manchester City yahise ikomeza mu kiciro gikurikiyeho n’igiteranyo k’ibitego 6-2 ndetse yabaye ikipe ya mbere mu mateka ya UEFA Champions League ibashije kwinjiza ibitego 3 mu mikino 9 yikurikiranya yakiniye kuri stade yayo.
Andi makipe yagerageje kubikora ni Benfica yo muri Portugal, Real Madrid yo muri Espagne na Bayern Munich yo mu Budage gusa izi zose zabikoze mu mikino 8.
Hasigaye andi makipe 4 agomba gusanga Real Madrid, Manchester City, Bayern Munich na PSG muri 1/4 k’irangiza cya UEFA Champions League.
Aya makipe azakina icyumweru gitaha tariki 12-13 Werurwe 2024.
Ku wa kabiri tariki 12 Werurwe, Arsenal yo mu Bwongereza izakira FC Porto yo muri Portugal naho FC Barcelona yo muri Espagne yakire Napoli yo mu Butaliyani.
FC Porto yatsinze Arsenal mu mukino ubanza igitego 1-0 naho FC Barcelona na Napoli zinganya igitego 1-1 mu mukino ubanza.
Ku wa gatatu tariki 13 Werurwe, Atletico Madrid yo muri Espagne izakira Inter Milan yo mu Butaliyani naho Borussia Dortmund yo mu Budage yakire PSV Eindhoven yo mu Buholandi.
Mu mukino ubanza Inter Milan yari yatsinze Atletico Madrid igitego 1-0 naho Borussia Dortmund na PSV Eindhoven zanganyije igitego 1-1.
