Bayern Munich yo mu Budage na Paris Saint Germain yo mu Bufaransa zabaye ikipe za mbere zageze muri 1/4 cy’irushanwa ry’amakipe ya mbere iwayo ku mugabane w’Iburayi, UEFA Champions League.
Bayern Munich yari yakiriye Lazio Rome yo mu Butaliyani kuri stade yayo ya Allianz Arena maze ibasha kuyitsinda ibitego 3-0 bituma ikomeza mu kiciro gikurikiyeho.
Umukino ubanza wari warangiye Lazio itsinze igitego 1-0 bivuze ko Bayern Munich yasabwaga gutsinda uko byagenda kose kugira ngo ibashe gukomeza cyane ko iki aricyo gikombe bisa nkaho isigaje guhatanira.
Umwongereza Harry Kane yaje kubona igitego cya mbere cya Bayern Munich ku munota wa 38 ndetse Thomas Muller ashyiramo icya kabiri ku munota wa kabiri w’inyongera w’igice cya mbere.
Harry Kane yaje kongera kubona igitego ku munota wa 66 biba ibitego bitatu bya Bayern Munich mu gihe Lazio itigeze inyeganyiza inshundura. Bayern Munich yahise ikomeza ku giteranyo k’ibitego 3-1 mu mikino yombi.
Undi mukino waberaga muri Espagne kuri Reale Arena ya Real Sociadad yari yakiriye Paris Saint Germain. Umukino ubanza wari warangiye PSG itsinze ibitego 2-0.
Real Sociedad ntiyabashije kwihagararaho nk’ikipe iri mu rugo ngo yitware neza imbere ya PSG kuko yatsinzwe ibitego 2-1.
Kylian Mbappe niwe wafunguye amazamu ku ruhande rwa PSG ku munota wa 15 ndetse yongera no gutsinda igitego ku munota wa 56 ku mupira mwiza yarahawe na Kang-in Lee naho igitego cya Real Socieadad cyatsinzwe na Mikel Merino ku munota wa 89.
Imikino yombi yarangiye PSG ikomeje ku giteranyo k’ibitego 4-1. N’ubwo Real Socieadad yari yabashije kwitwara neza mu matsinda gusa ntiyabashije kurenga 1/8.
Imikino yo kwishyura ya 1/8 muri UEFA Champions League irakomeza kuri uyu wa gatatu tariki 6 Werurwe 2024 saa 22:00 z’ijoro za hano i Kigali.
Manchester City yo mu Bwongereza irakira FC Copenhagen yo muri Denmark kuri Etihad Stadium. Umukino ubanza wari warangiye Manchester City itsinze ibitego 3-1.
Real Madrid yo muri Espagne irakira RB Leipzig yo mu Budage kuri Santiago Bernabeu. Umukino ubanza wari warangiye Real Madrid itsinze igitego 1-0.
