Umwaka ushize w’imikino ntiwabaye mwiza ku ikipe ya Rayon Sports kuko yari yagize amahirwe yo gutwara igikombe cya Shampiyona iheruka 2019 gusa yirangaraho mu mikino yanyuma. Nk’ikipe nkuru ariko yarakoze maze itwara igikombe cy’amahoro itsinze mukeba wayo APR ku mukino wanyuma maze bikayiha itike yo kuzakina imikino nyafurika yaherukagamo mu myaka 4 ishize.
Kuri ubu zimwe mu nkingi za mwamba zari muri Rayon Sports zamaze gutandukana nayo harimo umunyaCameroon Leandre Willy Esomba Onana wagiye muri Simba Sport Club yo muri Tanzania, myugariro NDIZEYE Samuel wamaze kwerekeza muri Police FC, MUVANDIMWE Jean Marie Vianney wagiye muri Mukura VS ndetse hari n’abandi bitaramenyekana neza uko bimeze harimo umuzamu HAKIZIMANA Adolphe ndetse n’abandi gusa byumwihariko abafana b’iyi kipe bari bafite impungenge mu bwugarizi bwabo.
Nk’uko tariki 4 Nyakanga ari umunsi wo kwibohora mu Rwanda bityo bikaba umunsi w’ikiruhuko, ku kicaro cya Rayon Sports Kimihurura ho imirimo yarikomeje. Myugariro wo hagati MITIMA Isaac yongereye amasezerano muri iyi kipe ya Rayon Sports azamugeza muri 2025, ariko kandi mu biganiro byari bimaze igihe, myugariro unyura ku ruhande rw’iburyo wamaze gutandukana n’ikipe ya Kiyovu Sports, ubu twavuga ko ariwe ubanzamo mu ikipe y’igihugu Amavubi SERUMOGO Ally nawe akaba yamaze kumvikana n’iyi kipe y’i Nyanza gusinya imyaka ibiri.
Bidasubirwaho aba bombi ukongeraho umuzamu w’umugande Simon Tamale bose bikaba byemejwe bidasubirwaho n’iyi kipe ko ari abakinnyi bayo mu mwaka w’imikino ugiye kuza.
