Myugariro w’umwongereza w’imyaka 30 Harry Maguire yageze mu ikipe ya Manchester United 2019 avuye mu ikipe ya Leicester City kuri miliyoni £80 ndetse yarabaye umwe muri ba myugaruro bahenze kurusha abandi mu mateka y’umupira w’amaguru. Kugeza ubu ni nawe captain w’ikipe ya Manchester United.
Mu mwaka ushize w’imikino kubona umwanya wo gukina kuri Harry Maguire warusanzwe ubanzamo byaragoranye kuko bakinishaga Raphael Varane, Lisandro Martinez cyangwa se Victor Lindelof, ku buryo umwaka w’imikino wa 2022/23 warangiye Maguire abanje mu kibuga inshuro 16 gusa mu marushanwa yose. Ibi byose bikubitiraho ko umutoza wa Manchester United, Erik Ten Hag yifuza kuba yahindura captain w’iyi kipe akaba Umunya-portugal Bruno Fernandes aho kuba Harry Maguire ukabona ko bigoranye ko uyu myugariro ugifite amasezerano y’imyaka ibiri yaba agifite umwanya wo gukina mu ikipe ya Manchester United.
Kuri ubu ubuyobozi bwa Manchester United bukaba bwemeje ko kuri miliyoni £50 ushaka Harry Maguire yamwegukana. Bamwe basetse cyane bavuga ko aya mafaranga ari menshi bijyanye n’uko Harry Maguire yitwaye. Ikipe nka Tottenham Hotspur zavugwaga mu bamwifuza gusa ubu ngo zihugiye ku bandi bakinnyi. N’ubwo ariko Harry Maguire ashobora kutaguma muri Manchester United, umutoza w’ikipe y’igihugu y’Ubwongereza Daniel Southgate we aracyamukomeye, akemeza ko ari umukinnyi w’ingenzi cyane mu ikipe ye. Mu gihe ntakipe yamugura, ntakabuza Harry Maguire araguma muri Manchester United n’ubwo ibijyanye no kuba captain w’iyi kipe biri mu marembera.
