Real Madrid yo muri Espagne nyuma yo kurangiza umwaka ushize w’imikino itwaye igikombe cy’Umwami Copa del Rey gusa, muri uyu mwaka yari yongeye kwiyubaka ishaka kongera kujya ku gasongero. N’ubwo yatakaje abarimo kapiteni wayo Karim Benzema gusa yongeyemo Jude Bellingham, Joselu, Arda Güler n’abandi. Inkuru mbi yaturutse i Madrid ni uko umuzamu wayo wa mbere ukomoka mu Bubiligi Thibaut Courtois yagize ikibazo k’imvune ndetse ishobora kumara igihe kirekire.
Thibaut Courtois ubwo bari mu myitozo yagize imvune yo mu ivi (ACL injury) aho ari imvune ikomeye cyane ku buryo bisaba ko azabagwa. Ikinyamakuru The Athletic kivuga ko hafi uyu muzamu yagaruka mu kibuga ari muri Nzeri umwaka utaha wa 2024 usibye ko ashobora no kumara umwaka wose w’imikino atongeye gukandagira mu kibuga. Ubwo Courtois w’imyaka 31 yasohokaga mu myitozo itarangiye kubera imvune, yasohotse mu marira menshi ubona ko yababaye.
Thibaut Courtois yageze muri Real Madrid muri 2018 ubwo yaravuye mu ikipe ya Chelsea yo mu Bwongereza, kuri ubu amaze kuyikinira imikino 230 mu marushanwa yose, amaze gutwarana nayo ibikombe bya shampiyona ya Espagne 2 na UEFA Champions league 1. Kuri ubu Real Madrid isigaranye umuzamu umwe Andriy Lunin w’imyaka 24 ukomoka muri Ukraine gusa uyu ntiyaba umuzamu ngenderwaho mu ikipe nka Real Madrid. Amakuru dukesha Sky Sports avuga ko ikipe ya Real Madrid yaba yahise yerekeza amaso ku muzamu ukomoka muri Espagne uherutse gutandukana na Manchester United gusa kuri ubu udafite ikipe David de Gea, ndetse ngo ibiganiro byatangiye hagati ya Real Madrid n’abahagarariye uyu muzamu w’imyaka 32.
Imvune ya Thibaut Courtois si Real Madrid ya Carlo Ancelotti yonyine isize mu gihirahiro ahubwo n’ikipe y’igihugu y’Ububiligi y’umutoza Domenico Tedesco nayo ni uko. Ikipe y’Ububiligi ifite gukina igikombe k’iburayi gihuza amakipe y’ibihugu kizaba umwaka utaha wa 2024 kikazabera mu Budage. Birumvikana ko mu gihe Courtois yaba atarakira bizaba bigoye no kuri iyi kipe y’igihugu y’Ububiligi ubusanzwe afasha cyane.
