Aho ifaranga rikubise haroroha, ni ko mu Kinyarwanda bavuga. Ibi ni byo byatumye abakinnyi benshi bari kwerekeza muri Shampiyona itari izwi gusa ubu ikaba iri kujya ku gasongera no kurusha nyinshi zo ku mugabane w’iburayi. Ni shampiyona yo muri Saudi Arabia ya Saudi Pro League.
Benshi mu bakinnyi bifujwe n’amakipe yo muri Saudi Arabia ntibazuyaje kuyemerera bitewe n’agatubutse aya makipe aba atanga ugereranyije n’amafaranga amakipe y’iburayi atanga.
Ikipe ya Al-Ittihad itozwa na Nuno Espírito Santo uyu wananyuze mu makipe nka FC Porto, Wolverhampton Wanderers na Tottehnam Hotspur nk’umutoza, nyuma yo kwibikaho abarimo N’Golo Kante yavanye muri Chelsea, Karim Benzema yavanye muri Real Madrid, Fabinho wavuye muri Liverpool, João Pedro Neves Filipe bita Jota wavuye muri FC Porto n’abandi, uwarukurikiyeho ni Mohamed Salah w’ikipe ya Liverpool.
Umunyamisiri Mohamed Salah w’imyaka 31 ngo Al Ittihad yiteguye kumutangaho arenga miliyoni £300 mu myaka 3 n’inyongera ya miliyoni £26 ku mushahara. Liverpool yabanje kugorana ivuga ko uyu musore atagurishwa gusa amakuru ahari aravuga ko uyu musore ubwe yamaze kubwira ikipe ya Liverpool ko ashaka kugenda.
Kuva yagera muri Liverpool avuye muri AS Roma muri 2017, Salah yakiniye ikipe ya Liverpool imikino 307 ayitsindira ibitego 187. Ntagihindutse Mohamed Salah arakinira ikipe ya Liverpool umukino wa nyuma kuri iki cyumweru aho icakirana n’ikipe ya Newcastle United, ni umukino uri bubere kuri Anfiel stade y’ikipe ya Liverpool.
Mu gihe Salah yajya muri Al Ittihad araba abaye umukinnyi wa 3 ikipe ya Liverpool igurishije muri Saudi Arabia nyuma ya Jordan Henderson na Fabinho bose bamaze kwerekezayo.
Ikinyamakuru footballtransfers kivuga ko ikipe ya Liverpool ikimara gutakaza Mohamed Salah ihita yerekeza amaso muri Atletico Madrid gushaka umusore w’imyaka 23 ukomoka muri Portugal João Félix ngo aze kumusimbura.
João Félix kumutsindira ntabwo byoroshye ku ruhande rw’ikipe ya Liverpool kuko uyu musore anifuzwa n’ikipe ya FC Barcelona ndetse nawe n’iyo ashaka, nyamara ariko ikipe yo muri Saudi Arabia ya Al Hilal nayo iryamiye amajanja kuko nayo yifuza uyu musore.
