Ikipe ya Manchester United ni urugero rwiza rw’igihe baca umugani mu kinyarwanda bagira bati,”Ntawumenya aho bwira ageze.”
Iyi kipe yatije umusore bita Brandon Williams w’imyaka 22 y’amavuko mu ikipe ye Ipswich Town yo mu kiciro cya kabiri mu Bwongereza, uyu musore akaba akinisha ukuguru kw’ibumoso, agakina nka myugariro.
Ibibazo byavutse ni uko umukinnyi rukumbi ukina ku ruhande rw’ibumoso yugarira warusigaye muri Manchester United Luke Shaw yagize ikibazo k’imvune ndetse ashobora kumara igihe kigera ku mezi 2 ari hanze y’ikibuga. Ibi bije bisanga umukinnyi Tyrell Malacia waguzwe nk’umusimbura wa Luke Shaw, nawe wavunitse ndetse uzagaruka mu kibuga byibuze nyuma y’amezi abiri.
Umutoza wa Manchester United Erik Ten Hag asigaranye amahitamo atari menshi, gukinisha umwana w’imyaka 19 Alvaro Fernandez kuko ari we myugariro w’ibumoso asigaranye gusa nawe washoboraga gutizwa mu ikipe ya Granada yo muri Espagne, cyangwa se agakinisha Diego Dalot usanzwe ukina nka myugariro w’iburyo.
Umutoza Ten Hag ukurikije umukino ikipe ya Manchester United yakinagamo na Nottingham Forest kuri uyu wa gatandatu yahisemo guhengeka Diego Dalot aho gukinisha umwana udafite uburambe.
Ibi nibyo byatumye ikipe ya Manchester United ishaka uko yasubira ku isoko gushaka myugariro w’ibumoso mu gihe habura iminsi mike ngo isoko ry’igura n’igurisha ry’abakinnyi rifungwe. Mu makuru dukesha umunyamakuru Fabrizio Romano ni uko ikipe ya Manchester United yaba yerekeje mu ikipe ya Chelsea gushaka myugariro w’ibumoso umunya-espagne Marc Cucurella kuri ubu utakibona umwanya wo gukina muri Chelsea, akaza muri Manchester United nk’intizanyo.
