Uguhangana kwari kwinshi hagati ya Liverpool na Chelsea ku bakinnyi babiri aribo Moises Caiçedo na Romeo Lavia bombi bakina mu kibuga hagati gusa mu makipe atandukanye. Moises Caiçedo wa Brighton & Hove Albion yakomeze kwifuzwa na Chelsea ndetse ubona ko isa nk’iri mu rugamba yonyine gusa mu minsi yashize nibwo ikipe ya Liverpool nayo yari yinjiye mukureba uko yasinyisha uyu musore w’imyaka 21 y’amavuko ukomoka muri Ecuador.
Undi musore w’imyaka 19 y’amavuko ukinira ikipe ya Southampton yamanutse mu kiciro cya kabiri Romeo Lavia ukomoka mu Bubiligi nawe ukina mu kibuga hagati yari yifujwe bikomeye n’ikipe ya Liverpool gusa Chelsea iza kubyivangamo mu minsi yashize n’ubwo byarangiye ntakintu amakipe yombi yumvikanye. Mu binyamakuru bitandukanye amakuru yari menshi avuga kuri aba basore bombi uko bahanganiwe n’aya makipe yombi.
Kuri ubu amakuru ahari dukesha ikinyamakuru Sky Sports aravuga ko ikipe ya Southampton yaba yamaze kumvikana na Liverpool kuri Romeo Lavia ku gaciro ka miliyoni £60 gusa ngo n’ikipe ya Chelsea ntirava ku izima kuko igihanyanyaza. Iki kinyamakuru kandi kivuga ko ikipe ya Chelsea nayo yamaze kumvikana na Brighton & Hove Albion kuri Moises Caiçedo ku gaciro ka miliyoni £100 hanyuma ikazishyura izindi miliyoni £15 bitewe n’uko azitwara, muri make ikipe ya Chelsea yiteguye gutanga miliyoni £115 muri rusange kuri Moises Caiçedo.
