Mu gihe habura amasaha make ngo isoko ry’igura n’igurisha ry’abakinnyi rirangire, abakinnyi benshi bakomeje guhindura amakipe abandi bakomeje kuba mu gihirahiro bategereje amakipe mashya.
Muri iyi nkuru tugiye kugaruka ku bakinnyi bamaze guhindura amakipe n’abandi bagitegereje ko hagira ubwumvikane buba hagati y’ikipe ibashaka n’ikipe bavamo.
Ku ikubitiro umubiligi ufite inkomoko muri DR Congo Romelu Lukaku Bolingoli yamaze gusesekara mu murwa mukuru w’Ubutaliyani Roma aho agiye gusinyira ikipe ya AS Roma kuzayikinira muri uyu mwaka w’imikino nk’intizanyo ya Chelsea. Lukaku agera i Roma akaba yakiriwe n’imbaga y’abafana 5,000. Ubu bwumvikane bukaba bwahagaze asaga miliyoni £8.
Bitunguranye ikipe ya Chelsea yo mu Bwongereza yamaze kwibikaho rutahizamu unyura ku ruhande w’imyaka 21 wakiniraga ikipe ya Manchester City Cole Palmer. Uyu mukinnyi ukiri muto yari yagize intangiriro nziza muri Manchester City aho yayifashije nyuma yo kugurisha Riyad Mahrez. Ni imbaraga ku mutoza wa Chelsea Mauricio Pochettino wifuzaga umwataka nyuma yo kuvunikisha Christopher Nkunku. Chelsea ikaba yatanze agera kuri miliyoni £45 muri rusange kuri Cole Palmer.
Myugariro wa FC Barcelona umufaransa Clement Lenglet nyuma yo gukina umwaka wose w’imikino nk’intizanyo mu ikipe ya Tottenham Hotspur kuri ubu ku kigero cyo hejuru aragaruka muri shampiyona y’Ubwongereza nk’intizanyo ya FC Barcelona gukinira ikipe ya Aston Villa. Nyuma yaho myugariro Tyrone Mings avunikiye akaba azamara umwaka w’imikino wose hanze, Aston Villa irahanga amaso Lenglet ngo amubere umusimbura.
N’ubwo abo bamaze kugenda ariko hari abandi ibyabo bikiri mu kirere, bikaba bisa nk’ibizasaba isaha ya nyuma.
Ku ikubitiro ni umunya-Maroc Sofyan Amrabat w’imyaka 27. Uyu musore ukina mu kibuga hagati asanzwe akinira ikipe ya Fiorentina gusa kuri ubu nta mukino n’umwe arayikinira muri uyu mwaka w’imikino kuko ategereje ko ikipe ya Manchester United igira icyo ibikoraho. Kuva muri Kamena Amrabat yakomeje kuvugwa muri Manchester United ndetse bivugwa ko nayo imushaka, gusa aracyategereje ko iyi kipe hari icyo ibikoraho.
Undi mukinnyi ugitegereje ni Ansu Fati ukinira FC Barcelona. Ansu w’imyaka 20, yamaze kubwira FC Barcelona ko ashaka kugenda akava muri iyi kipe. Tottenham Hotspur niyo ihabwa amahirwe yo gutsindira uyu musore usatira izamu aca ku ruhande, nyamara andi makipe nka Chelsea na Liverpool zose zo mu Bwongereza nazo ziryamiye amajanja. Kimwe mu bituma Ansu yifuza gusohoka muri Barcelona ni uko atabona umwanya uhagije wo gukina.
Umuholandi Donny Van de Beek nawe ni undi mukinnyi wifuza kuva mu ikipe arimo ya Manchester United akerekeza ahandi. Van de Beek yagowe cyane no kubona umwanya wo gukina muri Manchester United, ubundi bikivanga n’imvune ibi bituma atabona ahazaza he muri iyi kipe. Kuri ubu Van de Beek w’imyaka 26 arifuzwa n’amakipe arimo Genoa, Lorient na Real Sociedad cyane ko ari umukinnyi mwiza wo mu kibuga hagati.
Isoko ry’igura n’igurisha ry’abakinnyi riraza kuba rifungwa kuri uyu wa gatanu saa 23:00 z’ijoro, nyuma yaho ntamukinnyi uzaba kuva mu ikipe imwe ajya mu yindi cyangwa ngo ikipe igure umukinnyi mushya.
