Ishyirahamwe ry’Umupira w’Amaguru mu Rwanda, FERWAFA, ryatangaje ko uwari umutoza w’Amavubi umudage Torsten Frank Spittler atazakomeza kuba umutoza mukuru nyuma y’uko impande zombi zinaniwe kumvikana mu biganiro byo kongera amasezerano.
Ibi FERWAFA yabitangaje kuri uyu wa kabiri tariki 21 Mutarama 2025 ibinyujije ku mbugankoranyambaga zayo.
Amasezerano ya Spittler yari yarangiye tariki 31 Ukuboza 2024 kuko ubwo yasinyaga amasezerano nk’umutoza mukuru w’ikipe y’igihugu y’u Rwanda Amavubi mu mpera z’umwaka wa 2023 yari yasinye amasezerano y’umwaka umwe.
Kuva icyo gihe, Spittler yatoje Amavubi mu mikino 14, atsindamo imikino 6, anganya imikino 4, atsindwa imikino 4, yinjije ibitego 13, yinjizwa ibitego 9.
FERWAFA yarangije itangazo ivuga ko umutoza mushya w’Amavubi araza gutangazwa mu gihe cya vuba.
