Mu gitondo cyo kuri uyu wa mbere tariki 4 Ugushyingo 2024 inkuru itari nziza yatashye mu matwi y’abafana ba Arsenal ko Edu Gaspar wari Sporting Director agiye kuva muri iyi kipe.
Edu yaramaze igihe ari iwabo muri Brazil ku bw’impamvu ze bwite gusa yasubiye mu Bwongereza mu ikipe ya Arsenal mu mpera z’icyumweru gishize..
Amakuru aravuga ko Edu yifuzwa n’itsinda rya Evangelos Marinakis risanzwe rifite amakipe arimo Nottingham Forest yo mu Bwongereza, Rio Ave yo muri Portugal na Olympiacos yo mu Bugereki ndetse ngo rirateganya kugura indi kipe mu minsi iri imbere.
Cyakoze amakuru ahari ntiyemeza neza niba iyi yaba ariyo mpamvu Edu yafashe umwanzuro wo gutandukana na Arsenal.
Edu w’imyaka 46 y’amavuko yageze muri Arsenal nka Technical Director muri 2019 gusa mu Ugushyingo 2022 agirwa Sporting Director wari umwanya mushya muri Arsenal.
Umunya-Brazil Edu yafatanyije na Mikel Arteta kongera kubaka ikipe ihatanira ibikombe aho yaguze abakinnyi bakomeye barimo Martin Odegaard, Declan Rice, Jurrien Timber n’abandi.
Ku bwa Edu, Arsenal yatwaye FA Cup imwe ndetse imaze imyaka ibiri irangiza ku mwanya wa kabiri muri Shampiyona ndetse niyo kipe yashoye amafaranga menshi mu myaka ahamaze nyuma ya Chelsea na Manchester United.
Arsenal yashoye amafaranga agera kuri miliyoni £867 yinjiza agera kuri miliyoni £202.
