Elvis
Rutahizamu w’Umurundi Bimenyimana Bonfils Caleb ukinira Kaizer Chiefs yatsinze ibitego bitatu byose bya penaliti, afasha ikipe ye gutsinda Stellenbosch FC ibitego 3-1.
Ibitego bya Kaizer Chiefs byagiyemo mu minota 11. Bimenyimana w’imyaka 24 yamaze mu kibuga iminota 59 mbere yo gusimburwa na Nkosingiphile Ngcobo ’Mshini’.
Uyu mukinnyi ukomoka mu Burundi yishimiwe n’abafana ndetse bamwe bitwaje ibyapa batangira kumugereranya na Erling Braut Haaland, Umunya-Norvège ukinira Manchester City uhagaze neza muri Shampiyona y’u Bwongereza.
Umwe yari afite icyapa cyanditseho ngo “Caleb ni Haaland wacu. Turi Man Chiefs, Kaizer Chiefs.’’
Haaland w’imyaka 22 ari kuvugisha benshi kubera ibitego amaze gutsinda aho mu mikino 13 yatsinze ibitego 20 mu mikino ya Premier League, UEFA Champions League na FA Community Shield.
Uyu rutahizamu ari ku mwanya wa gatandatu mu bakinnyi bazinjiza agatubutse mu mwaka, aho azibikaho miliyoni 39$ nk’uko bitangazwa n’Ikinyamakuru Forbes. Uru rutonde ruyobowe n’Umufaransa Kylian Mbappé uzinjiza miliyoni 128$.
Kugeza ubu muri Afurika y’Epfo hamaze gukinwa imikino itatu ya shampiyona, muri yo Bimenyimana amaze gutsinda ibitego bitandatu, anganya n’Umunyanamibia Peter Shalulile ukinira Mamelodi Sundowns.
Bimenyimana wanahawe igihembo cy’umukinnyi w’umukino, yavuze ko icyo yagiye gukora ari ukubona intsinzi kugira ngo bazegukane igikombe.
Yagize ati “Ndi hano kugira ngo ntsinde. Ntabwo ndeba uburyo igitego cyagiyemo, icyo nitaho kandi mpa agaciro ni ukubona intsinzi ku mukino. Nitwe tuzabigiramo uruhare kugira ngo twongere kujya dutwara ibikombe.”
Ikipe ya Kaizer Chiefs imaze gutwara ibikombe 54 mu bikinirwa muri Afurika y’Epfo. Gusa iyi kipe imaze imyaka irindwi itagikozaho imitwe y’intoki.
Mu nshingano umutoza wayo Arthur Zwane yahawe harimo no gutwara igikombe. Ateze amakiriro kuri Bimenyimana Caleb muri ba rutahizamu bazamufasha kubigeraho.
Bimenyimana Bonfils Caleb mbere yo kwerekeza muri Kaizer Chiefs yavuzweho kuba yasubira muri Rayon Sports, gusa birangira tariki ya 18 Kamena 2022, asinye amasezerano n’iyi kipe yo muri Afurika y’Epfo.
