Real Madrid yegukanye igikombe kiruta ibindi ku mugabane w’i Burayi, UEFA Super Cup, bituma ica uduhigo muri iki gikombe.
Real Madrid yatwaye UEFA Super Cup itsinze Atalanta Bergamo yo mu Butaliyani ibitego 2-0, ni ibitego byatsinzwe na Federico Valverde ku munota wa 60 na Kylian Mbappe wakinaga umukino we wa mbere muri iyi kipe ku munota wa 68.
UEFA Super Cup kikaba ari igikombe cyakinwaga ku nshuro yacyo ya 49, uyu mukino ukaba uhuza ikipe yatwaye UEFA Champions League n’ikipe yatwaye UEFA Europa League.
Kuri uyu wa gatatu tariki 14 Kanama 2024 nibwo wakinwaga hagati ya Real Madrid yatwaye UEFA Champions League na Atalanta yatwaye UEFA Europa League, uyu mukino wabereye kuri National Stadium iherereye Warsaw muri Polonye.
Dore uduhigo twasizwe na Real Madrid nyuma yo kwegukana iki gikombe:
- Real Madrid yahise iba ikipe ya mbere imaze kwegukana iki gikombe inshuro nyinshi mu mateka yacyo. Imaze kugitwara inshuro 6, yahise ica kuri FC Barcelona na AC Milan zimaze kugitwara inshuro eshanu.
- Dani Carvajal na Luka Modrić babaye abakinnyi ba mbere bamaze kwegukana UEFA Super Cup inshuro nyinshi, bamaze kuyitwarana inshuro eshanu na Real Madrid.
- Carlo Ancelotti utoza Real Madrid yabaye umutoza wa mbere utwaye UEFA Super Cup nyinshi mu mateka, amaze kuyitwara inshuro eshanu.
Gutwara iki gikombe kwa Real Madrid byagize kapiteni wayo Luka Modrić umukinnyi wa mbere umaze gutwara ibikombe byinshi muri iyi kipe, akaba yujuje ibikombe 27 yatwaranye na Real Madrid.
