Ikipe ya Rayon Sports WFC yatsinze AS Kigali WFC ibitego 5-2 mu mukino w’igikombe kiruta ibindi mu Rwanda mu bari n’abategarugori, FERWAFA Women Super Cup 2024 biyiha kwegukana igikombe.
Kuri uyu wa kane tariki 26 Nzeri 2024 muri Kigali Pel茅 Stadium nibwo habereye umukino wa FERWAFA Women Super Cup 2024 wahuje Rayon Sports WFC na AS Kigali WFC.
Muri uyu mukino watangiye saa kumi z’umugoroba, Rayon Sports niyo yatangiye ifungura amazamu ku munota wa 11, ni igitego cyatsinzwe na Gibi Mary Chavinda ukomoka muri Malawi.
AS Kigali WFC yavuye inyuma yishyura igitego yari yatsinzwe ndetse itsinda igitego cya kabiri, ni ibitego byatsinzwe na Iradukunda Callixte na Nguema Odette byatumye AS Kigali WFC irangiza igice cya mbere iyoboye umukino n’ibitego 2-1.
Mu gice cya kabiri umukino wafashe indi sura wiharirwa cyane n’ikipe ya Rayon Sports WFC yaje no gutsindamo ibitego 4 ari nabyo byayihesheje insinzi kuri uyu mukino.
Igitego cya kabiri cya Rayon Sports WFC cyatsinzwe na Gibi Mary Chavinda wari watsinze igitego cya mbere, Umunyakenya Rachael Muema Otolo yatsinze igitego cya gatatu, Khadidja Muhawenimana atsinda igitego cya kane naho Jeanine Mukandayisenga uzwi nka ‘KaBoy’ atsinda igitego cya gatanu muri uyu mukino ari nacyo cyabaye agashinguracumu.
Nyuma yo gutsinda uyu mukino ibitego 5-2, Rayon Sports WFC yahise yegukana igikombe kiruta ibindi nyuma yo kwegukana igikombe cya Shampiyona n’igikombe cy’Amahoro mu mwaka ushize w’imikino.
FERWAFA Women Super Cup 2024 ni umukino uhuza ikipe yatwaye igikombe cya Shampiyona giheruka n’ikipe yatwaye igikombe cy’Amahoro.
Kuri iyi nshuro si uko byagenze kuko uyu mukino wahuje Rayon Sports WFC yatwaye igikombe cya Shampiyona na AS Kigali WFC yabaye iya kabiri ku rutonde rwa shampiyona.
Icyatumye bigenda gutya ni uko Rayon Sports WFC yegukanye ibi bikombe byombi mu mwaka ushize w’imikino.
