Police WVC na APR WVC zageze ku mukino wa nyuma w’imikino ya kamarampaka (Playoffs) zisezereye RRA WVC na Ruhango WVC.
APR WVC yageze ku mukino wa nyuma isezereye Ruhango WVC biyoroheye cyane kuko yayitsinze imikino 2-0.
Umukino wa mbere wakinwe kuri uyu wa gatanu tariki 17 Gicurasi 2024 muri Ecole Belge de Kigali warangiye APR WVC itsinze Ruhango WVC amaseti 3-0 (25-16, 25-11, 25-15).
Mu mukino wa kabiri wabaye kuri uyu wa gatandatu muri Ecole Belge de Kigali n’ubundi, APR WVC yabaye iya mbere ku rutonde rwa shampiyona yongeye kwihanangiriza Ruhango WVC yabaye iya kane ku rutonde rwa shampiyona, iyitsinda amaseti 3-0 (25-8, 25-14, 25-19).
APR WVC yahise ikatisha itike iyerekeza ku mukino wa nyuma wa playoffs nyuma yo gutsinda imikino 2-0, yagombaga gutegereza umukino wa Police WVC na RRA WVC ngo imenye ikipe izakina nayo ku mukino wa nyuma.
Nyuma y’uyu mukino watangiye saa 12:00 hahise hajyamo umukino ukomeye cyane wa Police WVC yabaye iya kabiri ku rutonde rwa shampiyona na RRA WVC yabaye iya gatatu ku rutonde rwa shampiyona.
Umukino wa mbere wahuje aya makipe kuri uyu wa gatanu wari warangiye Police WVC itsinze RRA WVC bigoranye amaseti 3-2 (25-21, 18-25, 13-25, 25-19, 15-12).
RRA WVC y’umutoza Mutabazi yagombaga gushaka uko itsinda umukino kugira ngo bibe umukino 1-1 maze haziyambazwe umukino wa gatatu.
Ibi ariko ntibyaje kumukundira kuko Police WVC y’umutoza Christian yamuzibiye maze ahubwo abura n’iseti imwe byibuze.
Umukino warangiye Police WVC itsinze amaseti 3-0 (26-25, 25-17, 25-23), byanayifashije guhita isezerera RRA WVC yarifite igikombe giheruka ku giteranyo k’imikino 2-0.
Umukino wa nyuma wa playoffs ari nawo ugena ikipe itwara shampiyona ukaba uzahuza Police WVC na APR WVC mu bari n’abategarugori.
APR WVC yari yageze ku mukino wa nyuma mu mwaka ushize w’imikino ariko ntiyabasha gutwara igikombe, yatsinzwe na RRA WVC ku mukino wa nyuma amaseti 3-0, imikino yabereye muri BK Arena.
