Mu mukino w’umunsi wa 28 wa shampiyona y’Ubwongereza, English Premier League, Liverpool yanganyije na Manchester City bituma Arsenal iyobora urutonde rw’agateganyo rwa Shampiyona nyuma yo gutsinda Brentford.
Umunsi wa 28 wa English Premier League watangiye gukinwa tariki 9 Werurwe 2024 hakinwa imikino 5:
Manchester United 2-0 Everton
AFC Bournemouth 2-2 Sheffield United
Crystal Palace 1-1 Luton Town
Wolverhampton Wanderers 2-1 Fulham
Arsenal 2-1 Brentford
Imikino yakomeje kuri iki cyumweru tariki 10 Werurwe 2024 ari nabwo hari hategerejwe umukino karundura wa Liverpool na Manchester City. Ikipe yari gutsinda muri aya makipe abiri niyo yari guhita yegukana umwanya wa 1 warufitwe na Arsenal.
Ibi ariko byaje kurangira bitabaye kuko Arsenal yagumye ku mwanya wa mbere nyuma y’aho Liverpool inganyije na Manchester City igitego 1-1.
Manchester City niyo yabanje igitego ku munota wa 22 w’umukino cyatsinzwe na John Stones gusa Liverpool yaje kwishyura ku munota wa 49 kuri penaliti yatsinzwe na Alexis Mac Allister.
Mu yindi mikino yari yabaye kuri iki cyumweru;
Aston Villa 0-4 Tottehnam Hotspur
West Ham United 2-2 Burnley
Brighton & Hove Albion 1-0 Nottingham Forest
Umunsi wa 28 wa Premier League usigaje umukino umwe ikipe ya Chelsea yakiramo Newcastle United kuri uyu wa mbere, umukino uzaba saa 22:00 z’umugoroba.
Uyu munsi usize ikipe ya Arsenal ifashe umwanya wa mbere n’amanota 64 inganya na Liverpool iri ku mwanya wa 2 ariko ikayirusha ibitego kuko Arsenal yizigamye ibitego 46 naho Liverpool yizigamye ibitego 39.
Manchester City iri ku mwanya wa gatatu n’amanota 63. Uko amakipe 3 yazamukanye uyu mwaka mu kiciro cya mbere ni nako akurikiranye mu makipe ya nyuma muri shampiyona. Luton Town iri ku mwanya wa 18 n’amanota 21, Burnley ni iya 19 n’amanota 14 naho Sheffield United ni iya nyuma n’amanota 14.
