Nyuma yo kumara imikino 3 ikurikirana ntansinzi ikipe y’Arsenal ibona muri shampiyona y’Ubwongereza English Premier League yongeye kunezeza abafana bayo inyagira Crystal Palace ibitego 5-0.
Arsenal yari yageze kuri Noheli y’umwaka ushize ari iya mbere ku rutonde rwa shampiyona, nyamara iyi kipe yo mu mujyi wa London yaje kwisanga kuri Bonane haciyeho iminsi 6 gusa ku mwanya wa 4 ni nyuma yo kumara kunganya na Liverpool igitego 1-1, itsindwa na West Ham United ibitego 2-0, yongera gutsindwa na Fulham FC ibitego 2-1.
Kuri uyu wa gatandatu Arsenal yari yakiriye Crystal Palace kuri Emirates Stadium mu mukino w’umunsi wa 21 wa shampiyona. Muri uyu mukino Arsenal yaje kwitwara neza cyane maze itsinda ibitego 5-0.
Arsenal yabonye igitego cya mbere ku munota wa 11 gitsinzwe na myugariro wayo Gabriel Magalhães, ni igitego yaratsindishije umutwe, igitego cya 2 cyabonetse ku munota wa 37 w’umukino, ni umupira Magalhães yashyize ku mutwe ukubita ku muzamu wa Crsytal Palace maze yitsinda igitego. Igice cya mbere cyarangiye Arsenal iyoboye umukino n’ibitego 2-0.
Ku munota wa 59 Arsenal yaje kubona igitego cya 3 cyatsinzwe na Leandro Trossard, ni umupira waturutse ku muzamu David Raya, umupira awuha Gabriel Jesus, Jesus nawe awuha Trossard maze igitego kiraboneka, ni igitego cyatwaye amasegonda 10 uvuye ku izamu kugera mu rindi zamu.
Iminota 90 yarangiye Arsenal ifite ibitego 3 maze hongerwaho iminota 6. Hashize iminota 4 Arsenal yabonye igitego cya 4 gitsinzwe na Gabriel Martinelli winjiye mu kibuga asimbuye, uyu yanaje gutsinda igitego cya 5 ubwo hari hashize iminota 5 mu minota 6 y’inyongera. Arsenal irangiza umukino itsinze ibitego 5-0.
Nyuma yo gutsinda umukino, Arsenal yabaye ikipe ya mbere muri Premier League imaze gutsinda ibitego byinshi biturutse ku mipira y’imiterekano hatarimo penaliti, ni ibitego 13. Arsenal yahise ufata umwanya wa 3 n’amanota 43 inganya na Manchester City ya 2 ikarushwa amanota 2 na Liverpool iri ku mwanya wa mbere.
