Ibiro bya Perezida wa Leta Zunze Ubumwe z’Amerika, White House byatangaje ko Perezida Joe Biden yanduye COVID-19 ubwo yari mu bikorwa byo kwiyamamaza muri Las Vegas kuri uyu wa gatatu.
Mu itangazo rya White House, Umunyamabanga ushinzwe itangazamakuru muri iyi nyubako, Karine Jean-Pierre yavuze ko Biden yanduye COVID-19 mu gihe yari mu bikorwa bye bya mbere byo kwiyamamaza muri Las Vegas.
Karine Jean-Pierre yakomeje avuga ko Biden yagaragaje ibimenyetso bikakaye by’iyi ndwara ndetse ko agomba guhita asubira Delaware aho agomba kujya mu kato no gukomeza kwitabwaho.
N’ubwo Biden yahise yerekeza Delaware igitaraganya gusa n’ubundi byari biteganyijwe ko mu gihe yamara kwiyamamaza muri Las Vegas ariho yagombaga guhita agana.
Si ubwa mbere Joe Biden w’imyaka 81 y’amavuko arwara COVID-19 kuko no muri 2022 yasanzwemo iyi ndwara.
Umuganga wihariye wa Biden yavuze ko ubu yamaze guhabwa doze ya mbere ya Paxlovid, ikaba igabanya igihe cyo kumara uvurwa cyangwa kuba wapfa.
Joe Biden ni Perezida wa Leta Zunze Ubumwe z’Amerika kuva muri 2021 ubwo yatorerwaga uyu mwanya atsinze Donald Trump, byamugize Perezida wa 46 wa Leta Zunze Ubumwe z’Amerika.
Kuri ubu Joe Biden yongeye guhagararira ishyaka rya Democratic Party mu matora ya Perezida wa Leta Zunze Ubumwe z’Amerika ategerejwe mu Ugushyingo uyu mwaka.
Muri aya matora Biden azaba ahanganye na Donald Trump uharariye ishyaka rya Republican Party.
Uretse Biden warwaye COVID-19, Trump nawe aherutse kuraswa gusa isasu rihushura ugutwi ubwo yari mu bikorwa byo kwiyamamaza muri Pennsylvania.
