Umufaransa Paul Pogba ukinira ikipe ya Juventus yo mu Butaliyani yahagaritswe imyaka 4 adakina umupira w’amaguru kubera gukoresha imiti yongera imbaraga.
Tariki 20 Kanama 2023 nibwo Paul Pogba yakorewe isuzuma ry’umubima maze rigaragaza ko yakoresheje imiti yongera imbaraga, hari mbere y’umukino Juventus yarigiye gukinamo na Udinese muri shampiyona y’Ubutaliyani Serie A. Uyu mukino Pogba ntiyawukinnye kuko yagumye ku ntebe y’abasimbura.
Pogba yongeye gusuzumwa mu Ukwakira 2023 muri laboratwari ya Acqua Acetosa iherereye i Roma mu Butaliyani aho yari kumwe n’intumwa zari zoherejwe na Juventus nk’uko yari yabisabye. Iri suzumwa rya kabiri n’ubundi ryagaragaje ko yakoresheje imiti yongera imbaraga ya ‘DHEA’ itandukanye na ‘testosterone’ yari yasanzwemo mbere gusa iyo miti yombi ikaba ikora kimwe.
Gukoresha iyi miti binyuranyije n’amategeko nk’uko bigaragara mu ngingo ya 2.1 na 2.2 mu mategeko ya Shampiyona y’Ubutaliyani, Codice Sportivo Antidoping (CSA).
Kuva ibi byaba, Pogba ntiyongeye kugaragara mu kibuga kuko yari yarahagaritswe gukora imyitozo gusa yakomeje kwisobanura avuga ko atafashe iyo miti ku bushake.
Ku bwo gukoresha imiti yongera imbaraga, Pogba yashoboraga no kuregwa mu rukiko mpuzamahanga rw’imikino, Court of Arbitration for Sport (CAS) gusa aza gutabarwa n’uko ubuyobozi bwo mu Butaliyani bwemeje ko yafashe iyo miti ku bw’impanuka, atabikoze abigambiriye.
Kuri uyu wa kane nibwo La Repubblica yatangaje ko Paul Pogba yahagaritswe imyaka 4 adakina umupira w’amaguru. Ikirenze kuri ibi ikipe ya Juventus yakiniraga yahawe uburenganzira bwo guhita isesa amasezerano yarifitanye na Pogba cyangwa igakomeza kumwishyura umushahara we kugeza umasezerano ye arangiye muri 2026.
Imyaka 4 Pogba yahagaritswe irabarwa guhera tariki 11 Nzeri 2023 kugeza tariki ya 10 Nzeri 2027.
Paul Pogba ni umukinnyi w’imyaka 30 y’amavuko wamenyekanye akina mu kibuga hagati. Uyu mukinnyi n’ubwo akinira ikipe y’igihugu y’Ubufaransa gusa ababyeyi be ni abo muri Guinea.
Yakiniye Manchester United 2011-2012 mbere yo kwerekeza muri Juventus yakiniye muri 2012-16. Yaje kongera kugurwa n’ikipe ya Manchester United kuri miliyoni €105 byamugize umukinnyi waruhenze kurusha abandi mu mateka y’umupira w’amaguru icyo gihe uretse ko ubu benshi bamaze guhenda kumurusha.
Pogba ntiyabashije kwitwara neza cyane muri Manchester United n’ubwo yayifashije gutwara igikombe cya Europa League ari nacyo gikombe gikomeye iheruka muri 2017 byatumye asubira muri Juventus muri 2022.
Pogba kandi yanatwaranye n’ikipe y’igihugu y’Ubufaransa igikombe cy’isi cyo muri 2018 ndetse ari umwe mu bakinnyi ngenderwaho.