Ishyirahamwe ry’Umukino w’Amagare ku Isi, UCI, ryanyomoje amakuru yavugwaga ko irushanwa ry’isi ry’amagare rizabera mu Rwanda muri Nzeri 2025 ryaba rizimurirwa mu wundi mujyi kubera amakimbirane u Rwanda rufitanye na Repubulika Iharanira Demokarasi ya Congo.
Kuri uyu wa gatanu tariki 31 Mutarama 2025 nibwo UCI yanyomoje amakuru y’ibihuha yavugaga ko irushanwa ry’isi ry’amagare ritegerejwe kubera mu Rwanda hagati ya tariki 21-28 Nzeri 2025 ryaba rigiye kwimurirwa mu mujyi wa Martigny mu Busuwisi cyangwa ahandi hantu.
UCI yakomeje ivuga ko n’ubwo hari amakimbirane hagati y’u Rwanda na Repubulika Iharanira Demokarasi ya Congo gusa umutekano muke uri mu Burasirazuba bwa Repubulika Iharanira Demokarasi ya Congo naho Kigali yo ikiri nyabagendwa haba mu bukerarugendo n’ishoramari.
Umwuka mubi hagati y’u Rwanda na Repubulika Iharanira Demokarasi ya Congo umaze igihe gusa warushijeho gukara nyuma y’uko umutwe wa M23 ufashe umujyi wa Goma, mu gihe Leta ya Repubulika Iharanira Demokarasi ya Congo ishinja Leta y’u Rwanda gufasha uyu mutwe n’ubwo Leta y’u Rwanda nayo ihora ibihakana.