Ushobora kuba wibaza niba Red Arrows F.C ari ikipe ki izakina na APR FC ku mukino wa nyuma wa CECAFA Kagame Cup 2024 iri kubera muri Tanzaniya? Muri iyi nkuru niho ugiye kuyimenyera.
Red Arrows F.C ni ikipe ikina ikiciro cya mbere muri Zambia, iba Lusaka mu murwa mukuru wa Zambia, iyi kipe irangwa n’amabara y’umutuku n’umweru yashinzwe mu 1978.
Red Arrows F.C yakirira imikino yayo kuri Nkoloma Stadium, iyi sitade ikaba ifite ubushobozi bwo kwakira abafana ibihumbi 15.
Iyi kipe ni imwe mu makipe y’ubukombe muri Zambia aho imaze gutwara ibikombe bitandukanye birimo shampiyona ya Zambia yatwaye inshuro 3 (2004, 2022, 2023–24), igikombe k’igihugu inshuro imwe (2007), Zambian Challenge Cup yatwaye inshuro imwe (1982) na Zambian Charity Shield yatwaye inshuro ebyiri (2005, 2022).
Red Arrows F.C ku ruhando mpuzamahanga
Red Arrows F.C ntabwo ari ikipe y’igitangaza ku ruhando mpuzamahanga, imaze gukina CAF Champions League inshuro ebyiri gusa ntiyigeze na rimwe irenga ijonjora ry’ibanze uretse muri 2005 yageze mu ijonjora rya kabiri.
Uyu mwaka izongera yitabire CAF Champions League nyuma yo gutwara igikombe cya Shampiyona giheruka muri Zambia, ikaba izakina na Nyasa Big Bullets FC yo muri Malawi mu ijonjora ry’ibanze.
Red Arrows F.C imaze gukina CAF Confederations Cup inshuro eshatu, muri zo ntanarimwe yarenze amajonjora ngo ibe yagera mu matsinda.
Red Arrows F.C muri CECAFA Kagame Cup 2024
Red Arrows F.C yisanze mu itsinda B muri CECAFA Kagame Cup 2024, muri iri tsinda yarikumwe na Al-Hilal Club Omdurman (Sudan) yakuwemo na APR FC muri 1/2, Gor Mahia yo muri Kenya na AS Ali Sabieh yo muri Djibouti.
Muri iri tsinda, Red Arrows F.C itozwa n’umunya-Zambia Chisi Mbewe yazamutse ari iya kabiri n’amanota 6 inyuma ya Al-Hilal Omdurman.
Mu mikino itatu y’amatsinda Red Arrows F.C yatsinze ibiri itsindwa umwe yatsinzwe na Al-Hilal Omdurman ibitego 5-0. Muri rusange Red Arrows F.C yiniije ibitego bibiri, yinjizwa bitanu, bivuze ko yazamutse ifite umwenda w’ibitego bitatu.
Muri 1/2, Red Arrows F.C yahise ihura na Hay Al-Wadi SC yo muri Sudan maze iyikuramo iyitsinze ibitego 2-0 byabonetse mu minota 30 y’inyongera nyuma y’uko mu minota 90 amakipe yombi yari yanganyije 0-0.
Kuri iki Cyumweru tariki 21 Nyakanga 2024, Red Arrows F.C iracakirana na APR FC yo mu Rwanda ku mukino wa nyuma wa CECAFA Kagame Cup 2024 kuri KMC Stadium saa 14:00 z’umugoroba i Kigali.
Red Arrows F.C ntiratwara iki gikombe na rimwe, naho APR FC imaze kukibikaho inshuro 3 mu mateka yayo.
