Umutoza w’umubiligi wa Bayern Munich, Vincent Kompany yavuze ko imvune zagize uruhare rukomeye mu gutuma iyi kipe isezererwa na Inter Milan muri 1/4 cya UEFA Champions League.
Kuri uyu wa gatatu tariki 16 Mata 2025 nibwo ikipe ya Inter yakiriye Bayern mu mukino wo kwishyura wa 1/4 cya UEFA Champions League, umukino warangiye amakipe yombi aguye miswi y’ibitego 2-2.
Ibyavuye muri uyu mukino byahesheje ikipe ya Inter gukomeza muri 1/2 kuko umukino ubanza wari warangiye itsindiye mu Budage ibitego 2-1, yahise ikomeze ku giteranyo cy’ibitego 4-3, izahura na FC Barcelona muri 1/2.
Nyuma y’umukino, Vincent Kompany yavuze ko ikibazo gikomeye cyatumye ikipe ye ititwara neza imbere ya Inter ari ibibazo by’imvune.
Ati,”Twari dufite kumva ko tugomba gukina tudafite (Hiroki) Ito, (Dayot) Upamecano, (Jamal) Musiala, (Manuel) Neuer, (Alphonso) Davies, (Kingsley) Coman, na (Aleksandar) Pavlovic.”
Kompany yakomeje avuga ko ikipe ye yakinnye neza mu mikino yombi n’ubwo itabashije kubona intsinzi ndetse ko bibabaje kuba Bayern Munich itageze ku mukino wa nyuma ngo izawukinira kuri Sitade yayo ya Allianz Arena kuko ariho umukino wa nyuma wa UEFA Champions League w’uyu mwaka ariho uzabera.
Bayern Munich izagaruka mu kibuga ku wa gatandatu tariki 19 Mata 2025 ikina na FC Heidenheim muri shampiyona y’Ubudage, ikaba iyoboye iyi shampiyona n’amanota 69 mu mikino 29, ikaba irusha ikipe ya kabiri amanota 6.