Gasogi United yatsinze Kiyovu Sports ibitego 4-3 mu mukino wabimburiye indi y’umunsi wa 9 wa shampiyona kuri uyu wa kabiri tariki 5 Ugushyingo 2024.
Muri uyu mukino wabereye kuri Kigali Pelé Stadium saa cyenda z’umugoroba, Gasogi United niyo yabanje kubona igitego ku munota wa 13 gitsinzwe na Christian-Theodor Yawanendji-Malipangou ariko ku munota wa 16 gihita kishyurwa na Nizeyimana Djuma.
Ku munota wa 19, kapiteni wa Gasogi United Muderi Akbar yabonye igitego cya kabiri ndetse Christian-Theodor Yawanendji-Malipangou asongamo igitego cya gatatu ku munota wa 27, mu minota ya nyuma y’igice cya mbere Kiyovu Sports nayo yabonye igitego cya kabiri gitsinzwe na Mugisha Desire.
Mu gice cya kabiri ku munota wa 75, Niyongira Danny yatsindiye Gasogi United igitego cya kane mu gihe Dufitimana Pacifique yatsindiye Kiyovu Sports igitego cya gatatu ku munota wa 86 bituma umukino urangira ari ibitego 3 bya Kiyovu Sports kuri 4 bya Gasogi United.
Kiyovu Sports yinjijwe ibitego bine muri uyu mukino nyuma yo kwinjizwa ibitego bingana gutya n’ubundi mu mukino iheruka gutsindwamo na Rayon Sports ibitego 4-0.
Tariki 20 Ukwakira 2024 n’ubundi Marines FC yari yatsinze Kiyovu Sports ibitego 4-2 ndetse na tariki 26 Nzeri nabwo yatsinzwe na Police FC ibitego 4-0.
Mu mikino 8 Kiyovu Sports imaze gukina muri shampiyona y’uyu mwaka yatsinzemo umukino umwe gusa, itsindwa imikino 7, yinjije ibitego 8, yinjizwa ibitego 22 ni nayo imaze kwinjizwa ibitego byinshi, ifite amanota atatu, iri ku mwanya wa nyuma ariwo wa 16.
Kiyovu Sports ikaba ifite umukino w’ikirarane umwe izahuramo na APR FC.