Amakuru yanditswe n’ikinyamakuru UOL cyo muri Brazil aremeza ko Jurgen Klopp kuri ubu ushinzwe umupira w’amaguru ku Isi mu ruganda rwa Reb Bull ashobora kugaruka mu butoza mu ikipe y’igihugu ya Brazil cyangwa Real Madrid.
UOL yanditse ko amakuru atangwa n’ababa hafi ya Klopp bavuga ko atishimiye akazi gashya ari gukora muri Red Bull yatangiye mu ntangiriro z’uyu mwaka wa 2025 bityo ko ashobora gusubira mu mwuga w’ubutoza nyuma yo gutandukana na Liverpool muri 2024.
Ibi bihita bihuzwa no kuba ikipe y’igihugu ya Brazil iri gushaka umutoza mushya nyuma yo kwirukana Dorival Jr wayitozaga ndetse n’umutoza Carlo Ancelotti wa Real Madrid akaba ari ku ntebe ishyushye mu gihe atatwara igikombe muri uyu mwaka w’imikino.
Kuri ubu Real Madrid yamaze gusezererwa muri UEFA Champions League na Arsenal, ni iya kabiri muri shampiyona ya Espagne, irushwa amanota atatu na FC Barcelona ya mbere ndetse iri ku mukino wa nyuma wa Copa del Rey izahuramo na FC Barcelona.
Amakuru aravuga ko Jurgen Klopp mu gihe yagaruka mu butoza yakwemera gutoza ikipe y’igihugu ya Brazil cyangwa Real Madrid gusa.
Abandi batoza bahabwa amahirwe yo gutoza Brazil barimo Carlo Ancelotti mu gihe yaba atandukanye na Real Madrid na Jorge Jesus utoza Al-Hilal yo muri Arabiya Sawudite kuri ubu.
Naho abatoza bahabwa amahirwe yo gusimbura Carlo Ancelotti muri Real Madrid mu gihe yaba agiye barimo Zinedine Zidane waba uyigarutsemo na Xabi Alonso utoza Bayer Leverkusen kuri ubu.