Umunya-Cameroon Issa Hayatou wayoboye Impuzamashyirahamwe y’Umupira w’Amaguru muri Afurika, CAF, mu gihe k’imyaka ikabakaba 30 yitabye Imana azize uburwayi kuri uyu wa kane tariki 8 Kanama 2024.
Hayatou waburaga umunsi umwe ngo yuzuze imyaka 78 y’amavuko, yitabye Imana aguye i Paris mu Bufaransa azize uburwayi yaramaranye igihe kirekire.
Hayatou yayoboye CAF kuva mu 1988 kugeza muri Werurwe 2017, ni imyaka 29 yamaze kuri uwo mwanya.
Muri iki gihe Hayatou yari Perezida wa CAF, igikombe cy’Afurika, AFCON, cyongerewe ingufu, amakipe yo muri Afurika yitabira igikombe k’isi ariyongera ndetse ibikorwaremezo by’umupira w’amaguru birubakwa mu bihugu bitandukanye byo muri Afurika.
Uretse kuba Hayatou yarabaye Perezida wa CAF, yabaye Perezida w’inzibacyuho w’Impuzamashyirahamwe y’Umupira w’Amaguru Ku Isi, FIFA, muri 2015-2016, yabaye muri Komite Olempike muri 2001-2016 ndetse ahabwa umwanya w”icyubahiro muri iyi Komite.
