Kuri uyu wa gatandatu nibwo ikipe ya Manchester United yakiraga ikipe ya Brighton & Hove Albion mu mukino w’umunsi wa 5 wa shampiyona y’Igihugu y’Ubwongereza Premier League. Uyu mukino wabaye mu gihe haburaga umunsi umwe ngo umutoza wa Brighton & Hove Albion umutaliyani Roberto De Zerbi yuzuze umwaka yinjiye muri iyi kipe ndetse byamugendekeye neza kuko yatsinze uyu mukino ibitego 3-1.
Roberto De Zerbi ni umutoza w’umutaliyani wavutse tariki ya 6 Kamena 1979, kuri ubu afite imyaka 44 y’amavuko. Uyu mugabo yavukiye Brescia mu Butaliyani. De Zerbi yabaye umukinnyi aho yakinaga mu kibuga hagati, nyuma yo gukurira mu ikipe y’abato ya AC Milan De Zerbi yakiniye amakipe arimo Monza, Pavoda, Avellino, Salernitana, Lecco, Foggia, Arezzo, Catania, Napoli, Brescia, CFR Cluj na Trento.
De Zerbi yaje gusoza gukina umupira w’amaguru nk’uwabigize umwuga muri 2013 ubwo yakiniraga ikipe ya Trento kuri ubu iri mu kiciro cya 3 mu Butaliyani. Mu mikino 259 yakinnye, yatsinze ibitego 53. Nubwo nk’umukinnyi Roberto De Zerbi atabaye mwiza cyane gusa kuri ubu ni umwe mu batoza beza isi ifite aho atoza ikipe ya Brighton & Hove Albion.
Roberto De Zerbi yatangiriye umwuga wo gutoza mu ikipe ya Darfo Boario kuri ubu ikina mu kiciro cya 4 mu Butaliyani, iyi yayitoje umwaka umwe wa 2013-2014. Muri 2014 De Zerbi yakomereje mu ikipe ya Foggia yo mu kiciro cya 3 mu Butaliyani yari yaranakiniye, iyi yayitoje kugera muri 2016 mbere yo kwerekeza muri Palermo yamazemo umwaka umwe.
Muri 2017-2018 De Zerbi yatozaga ikipe ya Benevento nayo y’iwabo mu Butaliyani, ikina shampiyona y’ikiciro cya 3. Yaje kwinjira mu ikipe y’ikiciro cya mbere mu Butaliyani muri 2018 ubwo yatozaga ikipe ya Sassuolo kugeza muri 2021, ubundi yerekeza mu ikipe ya Shakhtar Donetsk yo muri Ukraine ari naho yavuye ajya mu ikipe ya Brihton & Hove Albion mu Bowngereza aho yaragiye gusimbura umwongereza Graham Potter warumaze kuva muri iyi kipe yerekeza muri Chelsea.
Roberto De Zerbi yageze muri Brighton & Hove Albion tariki ya 17 Nzeri 2022 bivuze ko kuri iki cyumweru yujuje umwaka atoza iyi kipe. Mu mwaka De Zerbi amaze muri Brighton & Hove Albion yatoje imikino 44, atsinda 23, anganya imikino 9, atsindwa imikino 12, yafashije ikipe ya Brighton & Hove Albion kubona itike yo gukina igikombe k’iburayi cya UEFA Europa League bwa mbere mu mateka yayo.
Ku ijanisha rya 62% niko ikipe ya De Zerbi yiharira umupira muri buri mukino, mu mikino 15 yahuje De Zerbi n’amakipe 6 ya mbere muri Premier League arimo Manchester United, Manchester City, Arsenal, Liverpool, Tottehnam Hotspur na chelsea yabashije gutsindamo imikino 8, yabashije kandi kwinjiza ibitego biri hejuru ya 3 mu mikino 18.
Roberto De Zerbi yujuje umwaka atoza Brighton & Hove Albion nyuma yaho yari no mu byishimo byo gutsinda Manchester United mu mukino w’umunsi wa 5 wa Premierl League aho yayitsinze ibitego 3-1.
Benshi bakekaga ko igenda rya Potter ryashoboraga gusubiza hasi ikipe ya Brighton & Hove Albion gusa umutoza De Zerbi yazibye icyo cyuho ndetse ahubwo arenzaho. Imitoreze ye iri no mu byatumye umusore nka Ansu Fati yemera gutizwa muri iyi kipe avuye muri FC Barcelona.
