Kuri uyu wa kabiri tariki 12 Nzeri 2023 nibwo ikipe ya Rayon Sports yafashe rutemikirere ku kibuga k’indege mpuzamahanga cya Kigali i Kanombe yerekeza muri Addis Ababa muri Ethiopia, aho yari kuva yerekeza i Cairo mu Misiri ubundi igahaguruka mu Misiri yerekeza muri Libya i Benghazi gukina umukino w’ijonjora rya kabiri rya CAF Confederations Cup n’ikipe ya Al Hilal Benghazi, gusa kuri ubu amakuru ahari kandi yizewe ni uko uyu mukino warutegerejwe kuri uyu wa gatanu tariki 15 Nzeri utakibaye.
Hari hashize iminsi mike muri Libya habaye imyuzure aho imibare yo kuri uyu wa kabiri igaragaza ko imaze guhitana abarenga 2,300 ndetse bikavugwa ko bashobora no kwiyongera kuko kuri ubu abarenga 10,000 baburiwe irengero. Ibi byabaye mu burasirazuba bwa Libya ndetse imigi irimo Derna, Susa, Bayda, Al Marj na Benghazi yose yagizweho ingaruka n’ibi biza.
Ibi biza rero byatumye amakipe yo muri Libya asaba ko imikino yayo yakwimurwa cyane ko bari mu gihe cy’akababaro. Byavugwaga ko umukino ushobora gukinwa ariko hagafatwa umunota wo kwibuka abahitanywe n’ibiza mbere y’umukino gusa amakuru ahari none aremeza ko ishyirahamwe ry’umupira w’amaguru muri Afurika CAF ryaba ryemeye ubusabe bw’amakipe yo muri Libya arimo na Al Hilal Benghazi ko imikino yayo yakwimurirwa mu cyumweru gitaha n’ubwo ntatangazo CAF irasohora ibivugaho.
Itangazo CAF iheruka gusohora ryibutsaga amakipe yombi yaba Rayon Sports na Al Hila ko kuri uyu wa kane tariki ya 14 Nzeri aribwo hategerejwe inama rusanga izavuga ku mukino.
Umukino wimuwe koko wahita ushyirwa ku wa gatanu w’icyumweru gitaha tariki ya 22 Nzeri, bivuze ko ikipe ya Rayon Sports urugendo yakoze none rwaba rubaye imfabusa kuko byazayisaba gukora urundi.
Cyaba ari igihombo kuri Rayon Sports, mu kiganiro n’itangazamakuru perezida wa Rayon Sports UWAYEZU Jean Fidele yari yatangaje ko uru rugendo ruzatwara ikipe ya Rayon Sports amafaranga arenga miliyoni 70 z’amanyarwanda ndetse iyi kipe byabaye ngombwa ko isiga umwe mu baganga bayo ndetse nabwo perezida Jean Fidele yatangaje ko ari ukubera amikoro.
Bibaye ntagihindutse ikipe ya Rayon Sports yateganyaga kugera muri Libya kuri uyu wa gatatu yakwisanga mu bihombo kubera ingendo yaba ikoze yarangiza ntikine, ikarenga ikazakora n’izindi.
