Kuri uyu wa gatandatu hakomezaga gukinwa umunsi wa gatatu wa shampiyona y’ikiciro cya mbere mu mupira w’amaguru hano mu Rwanda Primus National League. Kuri uyu munsi hakinwe imikino 5.
Umunsi wa gatatu wa shampiyona watangiye kuri uyu wa gatanu ikipe ya Rayon Sports yakira ikipe y’i Nyamagabe Amagaju FC, ni umukino warangiye amakipe yombi anganya igitego 1-1, ni umukino wanasize impaka ku misifurire yawo.
Kuri uyu wa gatandatu ikipe ya Musanze yakiraga ikipe ya Sunrise kuri stade Ubworoherane, ni umukino warangiye ikipe ya Musanze itsinze ibitego 2-1. Ibitego bya Musanze byatsinzwe n’umusore ukomoka muri Ghana Mohammed Sulley ku munota wa 4, ikindi gitsindwa n’umunyarwanda MUHIRE Anicet ku munota wa 89, igitego kimwe cya Sunrise cyatsinzwe na HABAMAHORO Vincent ku munota wa 59.
I Rubavu kuri stade Umuganda hari umukino karundura w’amakipe yaho (derby) ni Marines FC yakinaga na Etincelles. Uyu mukino warangiye Marines itsinze igitego 1-0 cyatsinzwe n’umunyarwanda GIKAMBA Ismael ukina hagati mu kibuga ku munota wa 83.
Kuri stade ya Ngoma ikipe ya Etoile de l’Est yazamutse uyu mwaka yari yakiriye APR FC. Benshi batekerezaga ko APR FC iza gutsinda umukino biyoroyehe gusa siko byagenze kuko byasabye iminota 77 y’umukino ngo KWITONDA Alain Bacca atsinde igitego rukumbi cyabonetse mu mukino ari nacyo cyatandukanyije impande zombi. Ni igitego kiza cyane yatsinze nyuma y’umupira waruzamuwe neza ugana mu izamu maze atera ngarama iyo bakunze kwita racket, over-kick cyangwa garrincha. Kuva yazamuka ikipe ya Etoile de l’Est ntirabona inota na rimwe muri shampiyona.
Kuri stade ya Bugesera naho ikipe ya Bugesera FC yari yakiriye ikipe ya Kiyovu Sports. Bitunguranye ikipe ya Kiyovu Sports yahahuriye n’uruva gusenya kuko yahanyagiriwe ibitego 4-0 na Bugesera FC. Ni ibitego byatsinzwe na Ani Elijah ku munota wa 22, Vincent Adams atsinda igitego cya kabiri ku munota wa 58, ku munota wa 68 myugariro wa Kiyovu Sports NDIZEYE Eric aza kwitsinda igitego naho ku munota wa 87 MUZUNGU Olivier atsinda igitego cya 4. Umukino urangira ari ibitego 4-0 bya Bugesera, mu rugendo rusaba iminota 30 gusa kuva i Bugesera ugaruka i Kigali rwabaye rurerure ku bayovu batumvaga ibimaze kubabaho.
Undi mukino warutegerejwe na benshi kuri Kigali Pele Stadium, ikipe ya Gasogi United yari yakiriye ikipe ya As Kigali, ni umukino Gasogi United yitwayemo neza ibifashijwemo na Ndjoumekou watsinze igitego cya mbere ku munota wa 68 na Akbar watsinze igitego ku munota wa 77, gusa AS Kigali yabonye igitego ku munota wa 74 cyatsinzwe na Kone Felix, ni umukino warangiye Gasogi United itsinze ibitego 2-1. Nyuma y’umukino Perezida wa Gasogi United yatangaje ko bagomba gukina umukino wa gishuti n’ikipe ya APR FC muri iki kiruhuka kigiye kujyamo kubera imikino y’amakipe y’ibihugu.
Imikino 2 isigaye ngo umunsi wa gatatu wa shampiyona y’u Rwanda Primus National League urangire, irakinwa kuri iki cyumweru tariki ya 3 Nzeri 2023. Kuri stade ya Ngoma ikipe ya Muhazi United izakira Gorilla FC naho kuri Kigali Pele Stadium ikipe ya Police FC yakire Mukura VS&L, ni imikino yose izakinwa saa 15:00 z’umugoroba.
