Ibihuha byari bikomeje kuba byinshi ko rutahizamu w’umufaransa Kylian Mbappe isaha n’isaha bishobora kurangira avuye muri Paris Saint Germain akerekeza muri Real Madrid imwifuza.
Kylian Mbappe yabanje kubitera ishoti agaruka mu myitozo ya Paris Saint Germain ndetse ayemerera kongera umwaka w’amasezerano ndetse kuri ubu umutoza wa Real Madrid Carlo Ancelotti nawe yagize icyo abivugaho.
Mu kiganiro n’itangazamkuru Carlo Ancelotti yavuze ko ntamukinnyi Real Madrid ikeneye kongera mu ikipe, yagize ati;”Ikipe iruzuye neza 100%, iradanangiye, ntawundi mukinnyi dukeneye kongeramo.” Yakomeje avuga ko kandi igenda rya kapiteni Karim Benzema ritabahungabanyije kubera umwongereza Jude Bellingham yaje kuziba icyuho ke.
Kuri ubu nyuma y’iminsi ibiri ya shampiyona yo muri Espagne La Liga Santander, ikipe ya Real Madrid ihagaze ku mwanya wa mbere aho imikino yombi yayitsinze ndetse irakina umunsi wa gatatu kuri uyu wa gatanu icakirana na Celta Vigo saa 21:30 z’umugoroba za hano mu Rwanda.
Abakinnyi ba Real Madrid barimo umuzamu Thibaut Courtois, myugariro Eder Militao, myugariro Ferland Mendy, abakinnyi bo mu kibuga hagati Arda Guller na Dani Ceballos bose ntibazagaragara kuri uyu mukino kubera ibibazo by’imvune.
