Umunya-Espagne utoza ikipe ya FC Barcelona Xavi Hernandez akaba yamaze kongera amasezerano muri iyi kipe azamugeza muri 2025.
Xavi Hernandez w’imyaka 43 yagizwe umutoza wa FC Barcelona mu Ugushyingo 2021 ubwo yaravuye muri Al-Sadd yo muri Qatar. Hernandez ntiyari mushya muri iyi kipe kuko yayimazemo imyaka igera kuri 24 ubwo yari umukinnyi, nyuma yo gukurira mu ikipe y’abato ya La Masia yaje no gukinira ikipe nkuru ndetse ayigiriramo ibihe byiza aho yanayibereye kapiteni.
Kuva Xavi yagera muri FC Barcelona nk’umutoza amaze gutoza imikino 90, yatsinze imikino 60, atsindwa imikino 19, anganya imikino 17. Kuri ubu akaba amaze gutwara ibikombe 2 birimo igikombe cya Shampiyona ya Espagne La Liga aheruka kwegukana ndetse n’igikombe kiruta ibindi muri Espagne Supercopa de España.
Xavi Hernandez amaze kuzamura abakinnyi 12 abavana mu ikipe y’abato ya FC Barcelona izwi nka La Masia, ni abarimo Aleix Garrido, Ángel Alarćon, Chadi Riad, Marc Casadó, Iñaki Peña, Mika Mármol, Estanis Pedrola, Álvaro Sanz, Ferrant Jutglà, Ilias Akhomach, Lamine Yamal na Fermín López.
Mu byatumye FC Barcelona yongerera amasezerano Xavi Hernandez ni ukuba yaragerageje guhangana n’ibihe bibi iyi kipe irimo by’ubukene aho itakibasha kuba yagura abakinnyi uko ibyifuza nk’uko byahoze, ahannini kubera amafaranga y’umurengera yasohowe muri iyi kipe mu myaka yabanje nyamara abakinnyi yatanzweho bakaba ntamusaruro ufatika bayihaye.
Kuri uyu wa gatanu nibwo Xavi Hernandez yashyize umukono ku masezerano azamugeza tariki 20 Kamena 2025 ndetse ashobora kongerwaho undi mwaka. Aya masezerano akaba yayasinyiye mu biro biri muri Spotify Camp Nou, Perezida wa FC Barcelona Joan Laporta, Visi Perezida Rafa Yusta, Visi Perezida ushinzwe ubukungu Eduard Romeu n’ushinzwe imikino Anderson Luis de Souza uzwi nka Deco bose bari bahabaye.
