Mu gihe hakibura iminsi 2 ngo Rayon Sports yakire Al Hilal Benghazi mu mukino wo kwishyura w’ijonjora rya kabiri rya CAF Confederations Cup, Iyi kipe yatangaje ikigero ushyize kwijanisha amatike yo kureba uyu mukino amaze kugurwaho.
Rayon Sports yari yashyize amatike yo kureba umukino wayo na Al Hilal Benghazi mu byiciro 4; hari amatike ya 5,000 RWF ahasanzwe, 10,000 RWF ahatwikiriye, 25,000 RWF muri VIP na 50,000 RWF muri VVIP. Ibi biciro bikaba bireba abagura itike zabo hakiri kare kuko abazagura itike ku munsi w’umukino bizaba ari 8,000 RWF, 15,000 RWF, 30,000 RWF na 50,000 RWF.
Ibinyujije ku mbugankoranyambaga zayo, ikipe ya Rayon Sports yatangaje ijanisha amatike amaze kugurwaho kugeza kuri uyu wa kane. Rayon Sports yatangaje ko amatike ya 5,000 RWF y’ahasanzwe amaze kugurwa ku kigero cya 52%, amatike y’ahatwikiriye ya 10,000 RWF amaze kugurwa ku kigero cya 45%, amatike yo muri VIP ya 25,000 RWF amaze kugurwa ku kigero cya 30% naho amatike yo muri VVIP ya 50,000 RWF amaze kugurwa ku kigero cya 90%.
N’ubwo hatangajwe ibiciro by’amatike byo ku munsi wa w’umukino ushobora kwibaza niba koko uyu munsi uzagera hari amatike agihari.
Andi makuru meza ku bakunzi ba Rayon Sports ni uko Youssef Rhab, Eid Mugadam Abakar Mugadam na HAKIZIMANA Adolphe bari bafite ibibazo by’imvune bose bamaze kugaruka mu myitozo y’iyi kipe ndetse bashobora kuzagaragara ku mukino wo kuri uyu wa gatandatu.
Umukino ubanza wahuje Al Hilal Benghazi na Rayon Sports warangiye amakipe anganya 0-0, umukino wo kwishyura ikipe ya Rayon Sports yakira Al Hilal Benghazi yo muri Libya utegerejwe kuri uyu wa gatandatu saa 18:00 z’umugoroba kuri Kigali Pele Stadium.
