Byageze ku munsi wa nyuma rukigeretse mu itsinda C ryarimo Cameroon, u Burundi na Namibia. Umukino wa nyuma wagombaga guhuza Cameroon n’u Burundi niwo wagombaga gutanga amakipe abiri yarasigaye agomba gukina igikombe cy’Afurika mu mupira w’amaguru kizaba umwaka utaha. Uyu mukino warangiye Cameroon itsinze ibitego 3-0 byahise biyiha itike.
Mbere y’umukino ikipe y’igihugu ya Namibia yariyoboye itsinda n’amanota 5 ntamwenda ntan’igitego yizigamye, u Burundi bwari ubwa kabiri n’amanota 4 nta gitego ntanumwenda bufite naho Cameroon ikaba yari iya nyuma n’amanota 4 ntagitego ntanumwenda ifite.
Amategeko avuga ko mbere na mbere amakipe akurikirana hakurikijwe amanota, mu gihe amakipe anganya amanota hakurikizwa ibitego yizigamye, mu gihe nabyo bingana hiyambazwa ibitego ikipe yinjije. U Burundi bwari bwarinjije ibitego 4 naho Cameroon yarinjije igitego 1 gusa, ibi bisobanura ko u Burundi bwasabwaga kunganya gusa.
Mu gihe u Burundi bwari kubasha kunganya bwari guhita bubona itike, bukazamukana na Namibia hanyuma Cameroon igasigara. Ibi Cameroon yaribizi neza kandi ibizirikana, cyane ko yariri no mu rugo.
U Burundi bwaje kudahirwa kuko Cameroon yarifite inkingi za mwamba zayo zose zirimo umuzamu André Onana wa Manchester United, André-Frank Zambo Anguissa wa Napoli, Bryan Mbeumo wa Brentford, Eric Maxim Choupo-Moting wa Bayern Munich, Vincent Aboubakar wa Beşkitaş na Karl Toko Ekambi wa Abha yo muri Saudi Pro League, byarangiye itsinze umukino ibitego 3-0.
Abakinnyi b’abarundi barimo BIMENYIMANA Bon Fils Caleb, BIGIRIMANA Abedi, Amissi Cedrick, NTIBAZONKIZA Saidi, NAHIMANA Shassir, Umuzamu RUKUNDO Onesme ni bamwe mu babanje mu kibuga gusa batagize icyo bafasha ikipe yabo.
Igitego cya mbere cya Cameroon cyabonetse ku munota wa 46 gitsinzwe na Bryan Mbeumo, ku munota wa 59 Christopher Wooh usanzwe ukinira Rennes nka myugariro yatsinze igitego cya 2 hanyuma ku munota wa 90 harenzeho iminota 3 kapiteni Vincent Aboubakar atsinda igitego cya 3 ndetse umukino urangira utyo.
Nyuma y’uyu mukino ikipe y’igihugu ya Cameroon yahise iyobora itsinda n’amanota 7, ikurikirwa na Namibia ifite amanota 5 hanyuma u Burundi bugumana amanota 4. Cameroon na Namibia zahise zuzuza umubare w’amakipe 24 azakina igikombe cy’Afurika kizaba umwaka utaha.
Igikombe cy’Afurika gitegerejwe umwaka utaha wa 2024 muri Mutarama, kikazabera muri CĂ´te d’Ivoire, kikazitabirwa n’amakipe y’ibihugu agera kuri 24 nk’ibisanzwe. Kuri iyi nshuro ya 34 iki gikombe kizaba gikinwa ikipe y’igihugu ya Tanzania niyo yonyine izahagararira Afurika y’iburasirazuba.
