Kuri uyu wa kabiri nibwo ikipe ya APR FC yahagurutse i Kigali yerekeza mu Misiri gukina umukino wo kwishyura w’ijonjora rya kabiri rya CAF Champions League n’ikipe ya Pyramids FC. Umukino ubanza wari warangiye amakipe yombi anganyije 0-0 kuri Kigali Pele Stadium.
APR FC yahagurukanye mu Rwanda n’abakinnyi 26 n’abandi bantu 22 baherekeje ikipe, ni itsinda riyobowe na Chairman wa APR FC Lt. Col KARASIRA Richard. Muri uru rugendo APR FC yabanje guca i Addis Ababa muri Ethiopia hanyuma ikaba ariho iza guhaguruka yerekeza mu Misiri, biteganyijwe ko iribugere mu Misiri saa 02:30 zo mu rukerera, irakorera imyitozo 2 mu Misiri hanyuma ku wa gatanu tariki 29 Nzeri 2023 icakirane na Pyramids FC mu mukino wo kwishyura.
Ni kenshi amakipe yo mu Barabu aza mu gice byumwihariko k’iburasirazuba akiyoberanya, ku buryo ushobora kuyoberwa n’impamvu ikipe yitwa ko ikomeye nyamara nyuma yaho mwajya mu mukino wo kwishyura iwayo ikakwereka isura nshya n’iyo ariyo. Ibi biherutse n’ubundi kuba ku ikipe ya APR FC ubwo mu majonjora ya CAF Champions League aheruka yahuraga n’ikipe ya US Monastir yo muri Maroc, iyi kipe yatsindiwe mu Rwanda igitego 1-0 hanyuma igeze iwayo itsinda ikipe ya APR FC ibitego 3.
Umukino ubanza wahuje APR FC na Pyramids kuri Kigali Pele Stadium warangiye amakipe yombi anganyije 0-0. Muri uyu mukino ikipe ya Pyramids ibarirwa ku mwanya wa 4 mu makipe yo ku mugabane w’Afurika ntacyo yagaragaje kidasanzwe nk’ikipe y’igitangaza ndetse byarashobokaga cyane ko ikipe ya APR FC yashoboraga kuyitsinda.
Bitewe n’umukino wa mbere uko wagenze benshi bagira ikizere ko ikipe ya APR FC bishoboka ko ku nshuro yayo ya mbere yajya mu matsinda ya CAF Champions League ibashije gukuramo Pyramids FC. Gusa iyo dusubiye mu mateka iki kizere kirayoyoka ndetse benshi ahubwo bakitega ko ikipe ya APR FC ishobora guhurira n’uruva gusenya mu gihugu cya Misiri.
Team manager wa APR FC Rtd Capt NTAZINDA Eric yahumurije abafana ba APR FC agira ati,”Abafana bicare, beme, batuze. Kunyagirwa? Oya ibyo ntabyo ahubwo nayo (Yavugaga Pyramids FC) yanyagirwa.”
Pyramids FC ikipe iba i New Cairo mu Misiri ubu iri ku mwanya wa 3 muri Shampiyona y’igihugu ya Misiri nyuma y’iminsi 2 ya Shampiyona; izakira APR FC kuri  30 June Stadium tariki ya 29 Nzeri 2023 i saa 17:00 z’umugoroba za hano mu Rwanda.
