Mu gihe habura iminsi itatu (3) gusa ngo kuri Kigali Pélé Stadium yahoze yitwa stade Régional Nyamirambo habere umukino w’igikombe kiruta ibindi mu Rwanda FERWAFA Super Cup uhuza ikipe yatwaye igikombe cya Shampiyona n’ikipe yatwaye igikombe cy’Amahoro, ishyirahamwe ry’umupira w’amaguru mu Rwanda FERWAFA rikomeje kuburira abakunzi ba Rayon Sports na APR FC zizahurira muri uyu mukino hakiri kare ko burya amavuta y’umugabo ari amuraye ku mubiri.
Ubushize ubwo aya makipe yombi aheruka guhura, hari ku mukino wa nyuma w’igikombe cy’Amahoro wabereye kuri stade mpuzamahanga y’akarere ka Huye mu Majyepfo y’u Rwanda. Icyo gihe ikipe ya Rayon Sports ni yo yegukanye iki gikombe itsinze igitego 1-0, ibi byayihaye amahirwe yo gusohokera u Rwanda mu mikino nyafurika ya CAF Confederations Cup ariko kandi iba ari nayo igomba guhatanira igikombe cya Super Cup n’ikipe yatwaye shampiyona y’igihugu y’u Rwanda ari yo APR FC. Icyo gihe i Huye stade yarakubise iruzura ku buryo utari waguze itike hakiri kare atabonye uko areba umukino.
Kuri iyi nshuro nanone biri kwisubiramo, hashize iminsi 12 FERWAFA ishyize hanze ibiciro byo kureba uyu mukino wa Super Cup uzabera i Kigali kuri Kigali Pélé Stadium tariki ya 12 Kanama 2023 i saa 15:00 z’umugoroba. Gusa kuri ubu amatike akomeje kugurwa ku bwinshi ndetse ay’ibyiciro bimwe na bimwe yamaze gushira. Ibinyujije ku mbugankoranyambaga zayo, FERWAFA yatangaje ko itike z’ahasanzwe (General) zaguraga 3,000 RWF zamaze gushira, naho iz’ahatwikiriye zigura 10,000 RWF (Regular) zimaze kugurwa ku kigero cya 70% mu gihe itike zo mu myanya y’icyubahiro (VIP) zaguraga 20,000 RWF nazo zamaze gushira. Biteganyijwe ko umukino uzahuza Rayon Sports na APR FC kuri Kigali Pélé Stadium ntakabuza stade izaba yakubise yuzuye. Biteganyijwe ko mu rwego rwo kwirinda kavuye amarembo ya stade azafungurwa saa 11:00 hanyuma afungwe saa 14:00 kugira ngo hirindwe umuvundo w’abafana mu gihe umukino uzaba watangiye.
Uyu mukino ukaba warahawe abasifuzi aribo UWIKUNDA Samuel uzasifura hagati, uyu yaramaze iminsi 1330 adasifura umukino uhuza Rayon Sports na APR FC, MUTUYIMANA Dieudonne bakunze kwita Dodos azaba ari umusifuzi wa 2, ISHIMWE Didier ari umusifuzi wa 3, naho RURISA Patience Fidele azaba ari umusifuzi wa 4, HAKIZIMANA Louis azaba ashinzwe abasifuzi mu gihe komiseri w’umukino azaba ari KAYIJUKA Gaspard.
Imyitozo irakomeje ku mpande zombi ndetse ni wo mukino wa mbere kuva tariki ya 20/12/2012 ugiye kongera guhuza aya makipe yombi ari gukinamo abanyamahanga kuko APR FC yari yarimakaje umuco wo gukinisha abanyarwanda gusa.
