Kuri uyu wa gatanu nibwo hatangira gukinwa umunsi wa kabiri wa shampiyona y’ikiciro cya mbere mu mupira w’amaguru w’abagabo hano mu Rwanda Primus National League.
Ku ikubitiro saa 18:00 z’umugoroba ikipe ya Gasogi United yatsinzwe umukino wa mbere na Rayon Sports iraza kuba yakira ikipe ya Muhazi United kuri Kigali Pele Stadium. Uyu mukino waruteganyijwe kuba saa 15:00 z’umugoroba gusa ku bwumvikane amakipe yombi yemeranyije kuwimurira nimugoroba saa 18:00.
Imikino izakomeza ku munsi wo ku wa gatandatu tariki 26 Kanama 2023, Musanze FC izakira Bugesera FC ku Ubworoherane stadium, SC Kiyovu yakire AS Kigali kuri Kigali Pele Stadium, Sunrise FC yakire Etoile d’Est kuri Nyagatare Stadium naho Mukura VS&L i Huye yakire Marines FC. Iyi mikino yose izakinwa ku i saa 15:00 z’umugoroba.
Ku cyumweru imikino izakomereza kuri Kigali Pele Stadium ikipe ya Gorilla FC yakira Rayon Sports FC ku i saa 15:00 z’umugoroba. Byari biteganyijwe ko Amagaju FC azakira ikipe ya Etincelles kuri Huye Stadium saa 15:00 z’umugoroba gusa uyu mukino wimuriwe ku wa mbere tariki 28 Kanama 2023 kuri izo saha n’ubundi, impamvu yo kwimurwa k’uyu mukino ni uko ku cyumweru muri Huye Stadium hazabera ibirori byo gusoza ku mugaragaro irushanwa rihuza amashuri yo mu bihugu byo muri Afurika y’Iburasirazuba rizwi nka FEASSA riri kubera mu ntara y’Amajyepfo mu karere ka Huye na Gisagara.
Umukino uzafunga umunsi wa kabiri wa shampiyona uzahuza ikipe ya APR FC itarakinnye umunsi wa mbere kubera yari mu mikino nyafurika aho yanamaze kubona itike y’ijonjora rya kabiri muri CAF Champions League nyuma yo gukuramo Gaadiidka FC yo muri Somalia ku giteranyo k’ibitego 3-1, izaba yakiriye Police FC kuri Kigali Pele Stadium saa 18:00 z’umugoroba. Ni umukino ukunze kwitwa uw’umutekano.
Ni mu gihe kandi ishyirahamwe ry’umupira w’amaguru hano mu Rwanda FERWAFA ryamenyesheje amakipe yose yo mu kiciro cya mbere ko isoko ry’igura n’igurisha ry’abakinnyi rizafungwa tariki ya 28 Kanama 2023 saa sita z’ijoro. Nyuma y’iyo tariki nta kipe izaba yemerewe kugura cyangwa kugurisha umukinnyi.
