Kuri iki cyumweru tariki 24 Nzeri 2023 harakinwa umunsi wa 6 wa shampiyona y’Ubwongereza Premier League, ikipe ya Arsenal irakira ikipe ya Tottehnam Hotspur kuri stade yayo ya Emirates ni umukino wa derby y’Amajyaruguru ya London.
Dore icyo imibare ivuga kuri uyu mukino wa North London derby uhuza Arsenal na Tottehnam Hotspur:
- Ni ubwambere aya makipe agiye guhura ataratsindwa na rimwe muri Premier League, byaherukaga mu 1990 icyo gihe zanganyije 0-0 hari ku munsi wa 3 wa shampiyona.
- Ni inshuro ya 6 Arsenal igiye gukina na Tottehnam itaratsindwa muri shampiyona mu gihe Tottehnam ari inshuro ya 5.
- Mu mikino Arsenal yakiriye kuri stade yayo, ikipe ya Everton niyo yatsinze ibitego byinshi (76) ikurikirwa na Tottehnam kuko Arsenal yayitsinze ibitego 64 naho mu gihe Tottehnam yari yakiriye ikipe yabashije kwinjiza ibitego byinshi ni Liverpool kuko yayitsinze ibitego 64.
- Mu mikino 30 Arsenal iheruka kwakira Tottehnam, Arsenal yatsinzemo imikino 18, banganya imikino 11, Tottehnam ibasha gutsinda umukino umwe gusa.
- Imikino 3 umutoza w’Arsenal Mikel Arteta aheruka kwakiramo Tottehnam yarayitsinze.
- Mu mikino 5 iheruka guhuza aya makipe; Arsenal yatsinzemo imikino 3 naho Tottehnam itsinda imikino 2.
Arsenal igiye kwakira Tottehnam Hotspur iri ku mwanya wa 4 n’amanota 13 yizigamye ibitego 5 naho Tottehnam yo iri ku mwanya wa 2 n’amanota 13 yizigamye ibitego 8.
Abakinnyi b’Arsenal barimo Gabriel Martinelli, Thomas Partey na Jurrien Timber ntabwo bazagaragara muri uyu mukino mu gihe Ivan Perisic, Giovanni Lo Celso, Bryan Gil, Ryan Sessegnon na Rodrigo Bentancur nibo bakinnyi ba Tottehnam Hostpur batazagaragara muri uyu mukino.
Mikel Arteta utoza Arsenal avuga ko ari umukino ukomeye kuko Tottehnam ifite umutoza wahinduye imikinire ndetse yazanye umwuka mushya mu ikipe bityo ko ari umukino utazoroha gusa intego ari ugutsinda.
Postecoglu utoza Tottehnam Hotspour unaherutse kuba umutoza w’ukwezi muri Premier League yavuze ko ari urugamba rutoroshye cyane ko ari derby, avuga ko Arsenal ifite umukino mwiza ndetse yagize umwaka ushize w’imikino mwiza, akomeza agira ati,”Muri uyu mwaka bongereye imbaraga mu ikipe biragaragara ko bahagaze neza. Gukinira Emirates Stadium ni urugamba rw’ukuzimu.”
Umukino utegerejwe kuri iki cyumweru saa 15:00 z’umugoroba ukazabera Emirates Stadium kuri stade y’Arsenal, umukino ukazasifurwa n’umwongereza Robert Jones uzaba usifura uyu mukino bwa mbere mu mateka ye akaba ari inshuro ya 5 azaba asifuye umukino w’Arsenal mu gihe aheruka gusifurira Tottehnam Hotspur mu mukino iyi kipe yanganyijemo na Brentford ibitego 2-2.
