Umutoza w’imyaka 58 y’amavuko Roberto Mancini nyuma y’ibyumweru bibiri yeguye ku mwanya w’umutoza mukuru w’ikipe y’igihugu y’Ubutaliyani yamaze kugirwa umutoza mukuru w’ikipe y’igihugu ya Saudi Arabia.
Mu butumwa yanyujije ku mbugankoranyambaga ze; Mancini yagize ati;”Nakoze amateka mu Burayi, ubu ni igihe cya Saudi Arabia.” Yavuze kandi ko yishimiye kuba yatorewe uyu mwanya, anashima by’umwihariko perezida w’ishyirahamwe ry’umupira w’amaguru muri Saudi Arabia Yasser Al Misehal.
Roberto Mancini yaramaze imyaka 5 atoza ikipe y’igihugu y’Ubutaliyani ndetse biteganyijwe ko umutoza Luciano Spalletti uherutse gutwarana igikombe cya shampiyona y’Ubutaliyani Serie A n’ikipe ya Napoli ariwe ugomba kumusimbura kuri uyu mwanya. Muri iyo myaka 5, Mancini yatwaye igikombe k’ibihugu cy’Uburayi (Euro ya 2020), anegukana umwanya wa 3 muri UEFA Nations League ubugira kabiri, anaba kabiri muri Finalissima.
Mancini yasinye amasezerano nk’umutoza wa Saudi Arabia azamugeza muri 2027, akazajya ahembwa miliyoni £21 (pounds) ku mwaka.
Umukino wa mbere Mancini azatoza nk’umutoza mukuru uzaba tariki ya 8 Nzeri 2023 aho Saudi Arabia izakina na Costa Rica, ni umukino uzabera kuri St James’ Park ni stade y’ikipe ya Newcastle United yo mu Bwongereza.
Ikipe y’igihugu ya Saudi Arabia yatozwaga n’umutoza w’abatarengeje imyaka 23 Saad Al-Shehri, niwe wari wafashe izo nshingano nyuma yo gutandukana n’umufaransa Herve Renard.
Ikipe y’igihugu ya Saudi Arabia yitabiriye ibikombe by’isi byose biheruka yaba icya 2018 n’icya 2022 gusa hose yaviriyemo mu matsinda, byumvikana ko ari akazi katoroshye kuri Roberto Mancini.
Roberto Mancini ni umutaliyani wabaye umukinnyi nyuma aba umutoza. Nk’umukinnyi yakiniye amakipe y’iwabo arimo Lazio, Sampdoria, Bologna na Leicester City yo mu Bwongereza. Nk’umutoza Mancini yatoje amakipe arimo Manchester City, Galatasaray, Inter Milan, Fiorentina, Lazio, Zenit St Petersburg n’ikipe y’igihugu y’Ubutaliyani, bivuze ko Saudi Arabia ari ikipe ya kabiri y’igihugu agiye gutoza.
Mu mikino 791 Mancini amaze gutoza, yatsinze imikino 433, anganya 191, atsindwa imikino 160. Nk’umutoza Roberto Mancini yatwaye ibikombe 14 birimo Coppa Italia 4, Shampiyona y’Ubutaliyani Seria A 3 ubwo yatozaga Inter Milan, Supercoppa Italiana 2, Shampiyona y’Ubwongereza Premier League 1 ubwo yatozaga Manchester City, FA Cup 1, FA Community shield 1, igikombe k’ikihugu cyo muri Turkey Turkish Cup 1 ubwo yatozaga Galatasaray na Euro 1 yatwaranye n’ikipe y’igihugu y’Ubutaliyani.
