Ku wa kabiri w’iki cyumweru tariki 12 Nzeri 2023 nibwo ikipe ya Rayon Sports yerekeje i Benghazi muri Libya aho yarigiye gukina n’ikipe ya Al Hilal umukino ubanza w’ijonjora rya kabiri rya CAF Confederations Cup. Kuri iki cyumweru akaba aribwo Rayon Sports yongeye gusesekara i Kigali ivuye muri Libya.
Rayon Sports yageze muri Libya ku wa gatatu tariki 13 Nzeri 2023 gusa biza kurangira umukino waruyijyanye warutegerejwe tariki ya 15 Nzeri utabaye kuko ikipe ya Al Hilal Benghazi yasabye ko imikino yombi (ubanza n’uwo kwishyura) yazabera i Kigali kuko igihugu cya Libya giherutse kwibasirwa n’ibiza.
N’ubwo umukino wasubitswe ntibyatumye ikipe ya Rayon Sports ihita igaruka mu Rwanda ahubwo yagumye muri Libya ndetse yahakoreye imyitozo igera kuri 3.
Kuri uyu wa gatandatu saa 11:00 nibwo ikipe ya Rayon Sports yahagurutse ku kibuga k’indege mpuzamahanga cya Benina yerekeza i Cairo mu Misiri, yavuye mu Misiri yerekeza Addis Ababa muri Ethiopia ubundi ihaguruka muri Ethiopia igana i Kigali mu Rwanda.
Mu ma saa 13:00 nibwo ikipe ya Rayon Sports yasesekaraga ku kibuga k’indege mpuzamahanga cya Kigali i Kanombe ndetse yakiranwa ubwuzu bwinshi n’abafana bayo bari bagiye kuyakira ku kibuga k’indege.
Abakinnyi baraza gufata ikiruhuko cy’umunsi umwe w’ejo ku wa mbere hanyuma ikipe izongera gusubukura imyitozo ku wa kabiri tariki ya 19 Nzeri 2023. Ikipe ya Al Hilal Benghazi nayo yahise yerekeza mu Misiri akaba ariho igiye gutegurira umukino mbere yo kuza mu Rwanda.
Nk’uko byemejwe n’impuzamashyirahamwe ry’umupira w’amaguru ku mugabane w’Afurika CAF umukino ubanza uzahuza Al Hilal Benghazi na Rayon Sports uzaba tariki ya 24 Nzeri 2023 ubere kuri Kigali Pele Stadium hanyuma umukino wo kwishyura ukinwe tariki ya 30 Nzeri 2023 n’ubundi kuri Kigali Pele Stadium.
