Umutoza wa Manchester City Pep Guadiola yatakagije umusore w’iyi kipe Rico Lewis avuga ko ari umukinnyi w’igitangaza nyuma y’umukino iyi kipe yatsinzemo RB Leipzig yo mu Budage ibitego 3-1 mu mukino w’umunsi wa kabiri wa UEFA Champions League.
Rico Lewis ni umukinnyi w’umwongereza ukinira Manchester City wavutse tariki ya 21 Ugushyingo 2004 bivuze ko ubu afite imyaka ikabakaba 19. Rico Lewis ukinisha akaguru k’iburyo yageze mu ikipe y’abato ya Manchester City ubwo yarafite imyaka 8 y’amavuko gusa nyuma aza kuzamurwa mu ikipe y’abakuru muri 2022.
Nyuma y’umukino Manchester City yatsinzemo RB Leipziga ibitego 3-1 muri UEFA Champions League Pep Guadiola yavuze ko Rico Lewis ari umukinnyi w’igitangaza ndetse ari mu beza yatoje yagize ati;”Aratangaje, afite imyaka 18 gusa ari mu bakinnyi beza n’aba naratoje kandi ndavugisha ukuri.”
Yakomeje agira ati;”Ibaze kuba ufite imyaka 18 ariko ukaba witwara nk’umuntu mukuru, ushobora gukina imyaka 4 cyangwa 5! Ntabwoba agira kandi nkunda uko yugarira, ni umukinnyi w’igitangaza!”
Mu gusoza kuvuga kuri uyu mukinnyi Pep Guadiola yagize ati;”Maze imyaka 15 mu mwuga wo gutoza, yewe natoje abakinnyi benshi beza gusa kubona umeze nka Rico Lewis we ntaho namubonye. Mbega umukinnyi we!”
Muri uyu mukino Manchester City yatsindiye mu Budage ibifashijwemo na Phil Foden ku munota wa 25, Julian Alvarez ku munota wa 84 na Jeremie Doku ku munota wa 90 nyuma yo kurengaho iminota ibiri naho igitego kimwe cya RB Leipzig kikaba cyatsinzwe na Lois Openda ku munota wa 48.
Rico Lewis yari yabanje mu kibuga hagati ndetse yakinnye umukino wose. Uyu musore ubundi akina nka myugariro w’iburyo gusa akinishwa no ku yindi myanya harimo nko gukina mu kibuga hagati yugarira cyangwa yataka ariko kandi ajya anakina nka myugariro w’ibumoso. Uyu mukinnyi wa metero 1.69 amaze gukinira Manchester City imikino 29, yayitsindiye igitego 1, atanga umupira umwe wavuyemo igitego gusa ni umwe mu bakinnyi bafite ahazaza.
