Nyuma yaho ikipe ya APR FC ibuze itike yo kujya mu matsinda ya CAF Champions League ikuwemo na Pyramids FC yo mu Misiri ku giteranyo cy’ibitego 6-1 na Rayon Sports ikabura itike ya CAF Confederations Cup ikuwemo na Al Hilal Benghazi yo muri Libya kuri penaliyi 4-1 nyuma y’uko amakipe yombi yaramaze kunganya 2-2 mu mikino yombi.
Biteganyijwe ko aya makipe yombi araza kugaruka mu kibuga mu mpera z’iki cyumweru akina imikino y’ikirarane y’umunsi wa 4 atakinnye kuko yari mu mikino nyafurika.
Biteganyijwe ko APR FC izakira Musanze FC isanzwe iyoboye shampiyona saa 18:00 z’umugoroba kuri Kigali Pele Stadium, ni ku munsi wo ku wa gatanu tariki ya 6 Ukwakira 2023.
Rayon Sports yo biteganyijwe ko izagaruka mu kibuga kuri uyu wa gatandatu ikina n’ikipe ya Marines i Rubavu tariki ya 7 Ukwakira 2023.
Shampiyona y’u Rwanda Primus National League igeze ku munsi wayo wa 5 ikipe ya APR FC iri ku mwanya wa 3 n’amanota 7 mu mikino 3 ikaba yizigamye ibitego 2 naho Rayon Sports iri ku mwanya wa 9 n’amanota 5 mu mikino 3 yizigamye igitego 1.
