Manchester United igomba gukina umukino muri UEFA Champions League n’ikipe ya Bayern Munich nyuma y’abakinnyi babarirwa mu 10 batazaboneka muri uyu mukino, byamaze kwemezwa ko n’uwitwa Harry Maguire atazagaragara muri uyu mukino kubera ikibazo k’imvune.
Harry Maguire ukina nka myugariro kuri ubu ntagifite umwanya ubanzamo mu ikipe ya Manchester United ndetse ahubwo no gukoreshwa bigaragara ko umutoza Erik Ten Hag aba atabifite muri gahunda.
Harry Maguire yari muzima ndetse yagombaga guhagurukana na bagenzi be bava i Manchester mu Bwongereza berekeza mu ntara ya Bavaria gukina n’ikipe ya Bayern Munich mu mukino wa mbere w’amatsinda ya UEFA Champions League, gusa uyu myugariro w’imyaka 31 yaje kugira ikibazo k’imvune mu myitozo ya nyuma yo kuri uyu wa kabiri, icyateye iyi mvune nticyatangajwe ndetse n’igihe azamara hanze y’ikibuga ntabwo kiramenyekana.
Uwavuga ko ikipe ya Manchester United imeze neza ho yaba abeshye kuko n’imibare irabigaragaza. Mu mikino 5 Manchester United iheruka gukina yatsinze imikino 2, itsindwa imikino 3, ni imibare itari myiza ku ikipe nka Manchester United.
Manchester United yamaze gutangaza abakinnyi 21 yajyanye mu Budage gukina na Bayern Munich ndetse ni urutonde rwiganjeho abakinnyi bakiri bato barimo Hannibal Mejbri, Dan Gore, Omari Forson n’abandi. Abakinnyi iyi kipe iheruka gusinyisha barimo Rasmus Hojlund, Andre Onana, Atlay Bayindir na Sergio Reguilon nabo bari kuri urwo rutonde.
Ukubura kwa Harry Maguire ku mukino wa Manchester United na Bayern Munich kuraza kwiyongera ku barimo Raphael Varane, Mason Mount, Jadon Sancho, Amad Diallo, Kobbie Mainoo, Tyrell Malacia, Sofyan Amrabat, Luke Shaw na Antony bose batazagaragara kuri uyu mukino ku ruhande rwa Manchester United.
Mu mikino 5 iheruka guhuza Bayern Munich na Manchester United, Bayern Munich yatsinzemo imikino 3, banganya umukino 1 naho Manchester United itsinda umukino 1. Kuri ubu aya makipe yombi arikumwe mu itsinda rimwe rya A muri UEFA Champions League.
