Ni umukino w’igikombe kiruta ibindi ku mugabane w’iburayi UEFA Super Cup. Iki ni igikombe gihuza ikipe yatwaye UEFA Champions League n’iyatwaye UEFA Europa League, kuri iyi nshuro ya 48 gikinwa yari ikipe ya Manchester City yo mu Bwongereza yatwaye UEFA Champions League na FC Sevilla yo muri Espagne yatwaye UEFA Europa League.
Yari inshuro ya mbere ku ikipe ya Manchester City ihatanira iki gikombe mu gihe FC Sevilla yari inshuro ya 7 ihatanira iki gikombe. Ni umukino wabereye mu Bugereki kuri Karaiskakis stadium mu mugi wa Piraeus ahasanzwe hakinira ikipe ya Olympiacos yo muri iki gihugu.
Umutoza Pep Guadiola utarufite bamwe mu bakinnyi ngenderwaho be barimo nka Kevin De Brune wagize ikibazo k’imvune yabanje mu kibuza umuzamu Ederson Moraes, ba myugariro 4 aribo Kyle Walker ku ruhande rw’iburyo ari nawe wari wambaye igitambaro nka kapiteni, Josko Gvardiol mushya muri iyi kipe wavuye muri RB Leipzig ku ruhande rw’ibumoso, Manuel Akanji na Nathan Ake bari mu mutima w’ubwugarizi, hari abakinnyi 3 mu kibuga hagati ni Rodri na Mateo Kovacic naho Phil Foden ari imbere yabo, Cole Palmer yasatiraga izamu aca ku ruhande rw’iburyo, Jack Grealish aca ku ruhande rw’ibumoso naho Erling Haaland ari rutahizamu.
Ku ruhande rw’umutoza Jose Luis Mendilibar wa FC Sevilla yabanje mu kibuga umuzamu Bono, ba myugariro 4 aribo Marcos Acuña wacaga ku ruhande rw’ibumoso, Jesus Navas wacanga ku ruhande rw’iburyo, Nemanja Gudelj na Loic Bade bari mu mutima w’ubwugarizi, hari abakinnyi 3 mu kibuga hagati ni kapiteni Ivan Rakitic, Joan Jordan na Oliver Torres, uruhande rumwe rw’ubusatirizi rwacagaho Lucas Ocampos iburyo, Erik Lamela ibumoso naho Youssef En-Nesyri ashaka ibitego.
Amakipe yatangiye akina neza ku mpande zombi gusa ikipe ya Manchester City ariyo yiharira umupira cyane. Ibintu byaje guhinduka ku munota wa 25 ubwo umunya-argentine Marcus Acuña yazamuraga umupira uvuye mu ruhande rw’ibumoso usanga umunya-maroc Youssef En-Nesyri ahagaze neza aba ateretseho umutwe igitego kiba kiranyoye. Igice cya mbere cyaje kurangira ari igitego kimwe cya FC Sevilla ku busa bwa Manchester City.
Mu gice cya kabiri cy’umukino ikipe ya Manchester City yanahabwaga amahirwe, yaje gahunda ari ukwishyura gusa ba myugariro ba FC Sevilla nk’umufaransa Loic Bade n’umuzamu uturuka muri Maroc Bono bakomeza kuyibera ibamba. Byasabye ko ku munota wa 65 umusore ukomoka muri Espagne Rodrido Cascante bakunze kwita Rodri azamura umupira mu mitwe ashakisha bagenzi maze biramuhira usanga umusore ukiri muto w’imyaka 21 y’amavuko, umwongereza Cole Palmer ahagaze neza aba atsinze igitego cyo kwishyura.
Manchester City yakomeje kotsa igitutu FC Sevilla ishaka igitego cya kabiri gusa Sevilla nayo yihagararaho ndetse ikanyuzamu nayo ikabona amahirwe imbere y’izamu rya Manchester City gusa ikirangaraho. Ku munota wa 70 amakipe yombi yafashe akaruhuko gato ko kugabanya ubushyushye. Kera kabaye iminota 90 yarangiye amakipe yombi anganya 0-0. Hahise hakurikizwa itegeko rigenga iki gikombe cya UEFA Super Cup rivuga ko mu gihe amakipe yombi anganya mu minota 90 isanzwe y’umukino hahita hiyambazwa penaliti aho kujya mu minota 30 y’inyongera nk’uko bamwe babimenyereye.
Muri penaliti ikipe ya Manchester City niyo yabanje gutera umuzamu Bono wa FC Sevilla, penaliti ya mbere ya Manchester City yatsinzwe neza na Erling Haaland, ku ruhande rwa FC Sevilla rwateraga umuzamu wa Manchester City Ederson Moraes ni Lucas Ocampos wateye iya mbere nawe ayitsinda neza cyane. Julian Alvarez wagiye mu kibuga asimbuye yatsinze penaliti ya kabiri ya Manchester City maze na Rafa Mir nawe wagiyemo asimbuye atsinda iya kabiri ya FC Sevilla.
Penaliti ya gatatu ya Manchester City yinjijwe neza na Mateo Kovacic, Ivan Rakitic nawe yinjiza neza iya gatatu ya FC Sevilla. Jack Grealish yinjije penaliti ya kane ya Manchester City, Gonzalo Montiel nawe wagiyemo asimbuye yinjiza neza penaliti ya kane ya FC Sevilla. Kugeza aka kanya zari penaliti 4-4.
Kapiteni Kyle Walker wa Manchester City yinjije neza penaliti ya gatanu maze myugariro ukomoka muri Serbia wa FC Sevilla Nemanja Gudelj ateye penaliti ifata umutambiko w’izamu ijya hanze. Manchester City itwa Super Cup ityo kuri Penaliti 5-4.
Ku nshuro yayo ya mbere Manchester City ihatanira iki gikombe yahise igitwara mu gihe FC Sevilla mu nshuro 7 iheruka guhatanira iki gikombe yagitwaye gusa inshuro 1 yo muri 2006. Manchester City yiyongereye ku yandi makipe yo mu Bwongereza afite iki gikombe ariyo Liverpool, Manchester United, Chelsea, Nottingham Forest na Aston Villa.
Manchester City irahabwa miliyoni €5 ubwo ni arenga miliyari 5 z’amanyarwanda nk’iyatwaye igikombe mu gihe FC Sevilla irahabwa miliyoni €3.5 ubwo ni arenga miliyoni 4 z’amanyarwanda nk’iyabaye iya kabiri.
Iyi ni UEFA Super Cup ya 4 ku mutoza Pep Guadiola wa Manchester City nyuma y’uko izindi 2 yazitwaranye na FC Barcelona yo muri Espagne naho indi 1 ayitwarana na Bayern München yo mu Budage. Akaba yanditse amatike yo kuba ariwe mutoza wa mbere utwaye UEFA Super Cup mu makipe atatu atandukanye.
Iyi yari inshuro ya 8 ikipe yo mu Bwongereza ihurira n’ikipe yo muri Espagne kuri iki gikombe. Muri izo nshuro amakipe yo Bwongereza yatsinze inshuro 5 naho ayo muri Espagne atsinda inshuro 3.
Manchester City izagaruka mu kibuga ku wa gatandatu tariki 19 Kanama 2023 muri shampiyona y’igihugu y’Ubwongereza Premier League ikina umunsi wa kabiri aho izakira ikipe ya Newcastle United kuri Etihad Stadium saa 21:00 za hano mu Rwanda naho FC Sevilla izagaruka mu kibuga tariki 21 Kanama 2023 ikina na Deportivo Alaves muri shampiyona y’igihugu ya Espagne La Liga.
